Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget rĭm ƀing đaŏ khŏm thâo trap pre dŏ kơčăng nanao kiăng kơ hơdip tui hăng tơlơi Khua Yang kiăng lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ Mathiơ 24:44 tui hăng gah yŭ anai.
(1) Ding kơna pơjao Mathiơ čih pơruai glaĭ yom biă mă tơdang ñu ruai tui anai, “Tui anŭn, brơi kơ ƀing gih prap pre bĕ, yuakơ Ană Mơnuih či rai amăng mông ƀing gih ƀu pơmĭn Ñu či truh ôh,” kiăng laĭ, tơlơi prap pre kơ hrơi mông Yang Krist trŭn rai jing yom biă mă yơh, yuakơ anŭn jing hrơi mông hơnăl tuč kơ abih bang djuai mơnơ̆ng ƀơi lŏn tơnah anai yơh. Tơlơi prap pre anai ƀu djơ̆ jing tơlơi dŏ tơguăn kơ hrơi Yang Yêsu rai laih anŭn ƀu či ngă hơget gĕt ôh, samơ̆ tơlơi dŏ tơguăn anŭn ăt hơmâo hrŏm hăng tơlơi ngă bruă hiam klă pơtrŭt pơđu̱r ƀing ayŏng amai adơi đaŏ kiăng kơ thâo hơdip hơdơ̆ng rơgoh hiam nanao ƀơi anăp mơta Ơi Adai yơh. Tơlơi anai ăt či laĭ kơ tơlơi hơmâo đơđa mơnuih huĭ kơ djai tañ đơi laih anŭn ƀu kiăng prap pre dŏ tơguăn kơ hrơi Yang Krist ôh, yuakơ ƀing gơñu pơmĭn tơdah hơdip hơdơ̆ng rơgoh hiam, sĭt či tañ djai hĭ laih anŭn hơưi biă mă yơh kơ tơlơi hơdip pơdrŏng săh gơñu ƀơi lŏn tơnah anai.
(2) Ding kơna pơjao Mathiơ čih pơruai tui anŭn yuakơ ñu kiăng kơ abih bang mơnuih đaŏ khŏm thâo dŏ krơ̆ng dŏ bơbeh gah bơngăt mơyang abih hrơi mông kiăng kơ thâo dŏ kơčăng răng dŏ ataih mơ̆ng abih bang jing pơgrĭ hĭ drơi jan wơ̆t hăng kơnuih hơdip bơngăt pô yơh. Ñu ăt ră pơthâo mơ̆n kơ tơlơi Khua Yang či mă pơđuaĭ hĭ sa čô amăng dua čô, yuakơ sa čô thâo đaŏ kơnang kơ Yahweh Ơi Adai, samơ̆ pô adih wơ̆t tơdah yap ñu pô jing pô đaŏ kơnang, samơ̆ ƀu kiăng prap pre ôh kơ hrơi Khua Yang či trŭn rai anŭn. Hloh kơ anŭn dơ̆ng, ƀu djơ̆ Khua Yang či trŭn rai ngă mơneč kiăng kơ truh ƀơi hrơi mông ƀing đaŏ ƀu thâo dŏ kơčăng ôh, samơ̆ tơdang mơnuih mơnam wơ̆t hăng ƀing đaŏ pơmĭn kơ tơlơi Yang Krist akaih rai laih anŭn ƀu či rai dơ̆ng tah, ƀơi mông anŭn yơh ƀing gơñu či ƀuăh hlŏng lar yơh yuakơ hrơi mông Khua Yang hơmâo truh laih ƀơi lŏn tơnah anai. Mơnuih mơnam ăt pơmĭn kơ tơlơi Khua Yang či truh ƀơi hrơi mông pơanăp anai, samơ̆ ƀing gơñu ƀu prap pre brơi tơlơi hơdip gơñu kiăng kơ hơdip rơgoh hiam ƀơi anăp Khua Yang ôh.
(3) Jing ƀing đaŏ kơnang laih kơ Yang Krist, brơi kơ ƀing ta thâo dŏ kơčăng răng wai brơi tơlơi hơdip gah bơngăt ta kiăng kơ thâo hơdip hơdơ̆ng rơgoh hiam nanao ƀơi anăp Khua Yang bĕ, yuakơ ƀing ta ƀu či thâo krăn ôh ƀơi hrơi mông pă Yang Krist či trŭn rai dơ̆ng. Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Khua Yang hơi, brơi kơ ƀing ta thâo čih pioh răk djă̱ bĕ tơlơi Khua Yang ƀuăn či trŭn rai dơ̆ng tañ biă mă yơh, yuakơ hrơi mông anŭn či rai blĭp blăp ƀơi mông lu mơnuih ƀu či dŏ kơčăng dơ̆ng tah. Hơnŭn yơh, brơi kơ ƀing ta thâo prap pre ta pô nanao bĕ amăng hơdră jơlan Khua Yang kiăng kơ ƀing ta hơdip. Bơni hiam.