312. AKŎ: Anăm Phat Kơđi Tơdruă Ôh

312. AKŎ: Anăm Phat Kơđi Tơdruă Ôh

Posted on Posted in Uncategorized

 Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 312. AKŎ: Anăm Phat Kơđi Tơdruă ÔhTƠÑA: Yua hơget ƀing ayŏng amai adơi đaŏ ta năng anăm phat kơđi kơ tơdruă ôh lĕ?

LAĬ GLAĬ: Kơkuh kơ aibh bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ Rôm 14:10 tui hăng gah yŭ anai.

(1) Ding kơna pơjao Paul čih pơruai yom biă mă tơdang ñu laĭ tui anai, “Giŏng anŭn, yua hơget ƀing gih phat kơđi kơ ayoăng adơi gih lĕ? ƀôdah yua hơget ƀing gih djik djak kơ ayŏng adơi gih lĕ? Yuakơ abih bang ƀing ta či dŏ dơ̆ng ƀơi anăp grê Ơi Adai phat kơđi yơh,” kiăng laĭ, tơdang ƀing ta jing ƀing ayŏng amai adơi đaŏ amăng Yang Krist, abih bang ƀing ta năng tŭ ju̱m gŭm djru kơ tơdruă yơh, năng grơ̆ng glăm brơi tơdruă kiăng kơ pơư pơang anăn Yahweh Ơi Adai yơh, samơ̆ đơđa ƀing đaŏ ƀu ngă kar hăng anŭn ôh. Sĭt yơh ƀu djơ̆ ƀing hiam klă rơgơh hiam ôh dưi rai pơjơnum ƀơi Sang Ơi Adai ƀôdah ƀơi Anih Pơjơnum rĭm hrơi Tơjuh ƀôdah ƀơi hrơi hơmâo pơkơčăh laih, samơ̆ abih bang ƀing soh sat grĭ grañ yơh năng rai hơduah sem ƀô̆ mơta Khua Yang kiăng kơ tŭ tơlơi pap brơi tơlơi soh.

(2) Ding kơna pơjao Paul čih pơtô tui anŭn yuakơ kiăng kơ abih bang ƀing đaŏ thâo hơdip hơdơ̆ng khăp pap kơ tơdruă amăng tơlơi khăp Khua Yang yơh. Rĭm čô ƀing đaŏ khŏm thâo khăp pap kơ tơdruă yuakơ rĭm čô khŏm thâo khăp kơ Khua Yang Ơi Adai hăng abih pran jua, abih tơlơi pơmĭn, abih jua bơngăt laih anŭn hăng abih tơlơi kơtang yơh, giŏng anŭn ăt khăp kơ mơnuih re̱ng gah kar hăng thâo khăp kơ pô mơ̆n. Tơdang rĭm čô ƀing đaŏ kơ Yang Krist thâo ngă tơlơi bruă kar hăng anŭn, sĭt ƀing gơñu ƀu či phat kơđi kơ tơdruă ƀơi mơta tơlơi ƀing gơñu ƀuh ƀôdah pơmĭn djơ̆ tui hăng tơlơi pơmĭn gơñu pô kiăng ôh. Hloh kơ anŭn dơ̆ng, bruă phat kơđi kơ tơlơi bruă ngă soh pơkơdơ̆ng glaĭ hăng Ơi Adai anŭn jing bruă Khua Yang Ơi Adai pô yơh, ƀu djơ̆ bruă ƀing đaŏ ta ôh kiăng kơ phat kơđi tơdruă, yuakơ rĭm čô či dŏ dơ̆ng ƀơi anăp grê Ơi Adai phat kơđi, či tŭ tơlơi Ơi Adai phat ƀơi mơta bruă ƀing ta hơmâo ngă laih kơ ƀing ayŏng amai adơi ta yơh.

(3) Jing ƀing đaŏ kơnang laih kơ Yang Yêsu Krist, brơi kơ ƀing ta thâo krăn sĭt nik kơ tơlơi hơjăn Yahweh Ơi Adai đôč yơh dưi phat kơđi mơnuih ta čơdơ̆ng mơ̆ng ră anai amăng jua pơmĭn hlŏng truh pơ tơdơi adih gah kơdeh asar hlâo kơ tŭ tơlơi pơkơhma̱l hlŏng lar. Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Khua Yang hơi, brơi kơ ƀing ta anăm phat kơđi kơ tơdruă ôh kar hăng pơala kơ Ơi Adai ôh, yuakơ anŭn jing mơta bruă Ơi Adai či ngă ƀơi hrơi Ñu phat kơđi. Hơnŭn yơh, brơi kơ ƀing ta thâo khăp pap tŭ ju̱m tơdruă nanao bĕ tơdang hrơi mông mơyŭn Khua Yang dưi brơi kơ ƀing ta hơmâo ƀơi lŏn tơnah anai. Bơni hiam.

Leave a Reply

Your email address will not be published. Required fields are marked *