Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget pô pơala Nahum laĭ kơ tơlơi Yahweh jing hiam klă hăng pơgang brơi ƀing ană plơi Ñu amăng mông tơnap tap lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ Nahum 1:7 tui hăng gah yŭ anai.
(1) Pô pơala Nahum čih pơruai yom biă mă tơdang ñu laĭ tui anai, “Yahweh jing hiam klă; Ñu hrup hăng sa kơđông kơjăp kiăng pơgang ƀing ană plơi Ñu amăng mông tơnap tap. Ñu răk wai hlơi pô đaŏ kơnang kơ Ñu,” kiăng laĭ, Yahweh Ơi Adai jing hiam klă biă mă yơh kơ abih bang ƀing hlơi pô thâo đaŏ kơnang đuaĭ tui kơkuh pơpŭ kơ Ñu laih anŭn jing ƀing ană plơi Ñu. Tơlơi anŭn kiăng laĭ, Yahweh Ơi Adai jing phŭn kơ tơlơi bơni hiam kiăng kơ pha brơi tơlơi hiam klă kơ abih bang ƀing hlơi pô đaŏ kơnang kơ Ñu yơh. Samơ̆ hlơi pô ƀu đaŏ kơnang đuaĭ tui Ñu ôh, ñu anŭn ƀu či tŭ mă tơlơi bơni hiam mơ̆ng Ơi Adai ôh, samơ̆ či tŭ mă tơlơi răm rai mơ̆ng yang sat Satan yơh. Brơi thâo krăn sĭt: Ơi Adai ƀu djơ̆ jing phŭn kơ tơlơi hơtŏm păh ôh, samơ̆ tơdang Ñu mă pơđuaĭ hĭ tơlơi khăp pap Ñu, sĭt mơnuih soh sat či hơdip amăng tơlơi git gai ƀing yang sat yơh.
(2) Pô pơala Nahum čih pơruai tui anŭn yuakơ ƀing ană plơi Nineweh ƀu thâo huĭ pơpŭ kơ Yahweh Ơi Adai ôh laih anŭn ƀing gơñu nanao ngă tơlơi bruă sat ƀai ƀu thâo kơhma̱l hĭ ôh. Nahum čih pơtă tui anŭn yuakơ ñu kiăng kơ ƀing Israel thâo krăn sĭt, Ơi Adai khăp kơ ƀing gơñu biă mă tơl ƀing rŏh ayăt ƀu thâo krăn kơ Ơi Adai, Ơi Adai ăt či pơkơhma̱l hĭ mơ̆n. Anai jing tơlơi kơčrâo kơ tơlơi dưi Ơi Adai git gai abih bang lŏn tơnah yơh. Kơ ƀing hlơi pô thâo đaŏ kơnang kơ Ñu, Ñu pơgang hăng wai lăng brơi yơh, samơ̆ ƀing hlơi pô pơkơdơ̆ng glaĭ hăng Ñu, sĭt či tŭ tơlơi kơhma̱l yơh. Kiăng kơ hơmâo tơlơi git gai wai lăng hăng tơlơi pơgang brơi mơ̆ng Khua Yang Ơi Adai, mơnuih mơnam khŏm nao đaŏ kơnang đuaĭ tui kơkuh pơpŭ kơ Yahweh amăng abih tơlơi hơdip yơh.
(3) Jing ƀing ană bă Ơi Adai laih, brơi kơ ƀing ta thâo krăn sĭt kơ tơlơi amăng Khua Yang đôč yơh ƀing ta dưi hơduah ƀuh tơlơi pơgang brơi mơ̆ng ƀing rŏh ayăt gah kơđeh asar wơ̆t hăng gah bơngăt. Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Yang Krist hơi, brơi kơ ƀing ta thâo krăn sĭt bĕ kơ tơlơi dŏ kơjăp amăng Khua Yang jing hơmâo tơlơi rơnŭk hơđơ̆ng nanao yơh. Hơnŭn yơh, brơi kơ rĭm čô ƀing ta thâo tŭ ju̱m Khua Yang Yêsu nanao bĕ amăng tơlơi hơdip hơdơ̆ng ta rĭm hrơi. Bơni hiam.