Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget ƀing ta khŏm jing ƀing ană bă Ơi Adai sĭt tơdang dŏ hơdip ƀơi lŏn tơnai lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ 1 Yôhan 3:10 tui hăng gah yŭ anai.
(1) Ding kơna pơjao Yôhan čih pơtă yom biă mă tơdang ñu laĭ tui anai, “Anai yơh jing tơlơi ƀing ta thâo krăn hlơi pô jing ƀing ană bă Ơi Adai laih anŭn hlơi pô jing ƀing ană bă pô sat ƀai: Abih bang hlơi pô ƀu hơdip hơdơ̆ng tơpă hơnơ̆ng ôh, ñu anŭn ƀu djơ̆ ană bă Ơi Adai ôh; tơlơi anŭn ăt kar kaĭ mơ̆n kơ hlơi pô ƀu khăp ôh kơ ayŏng amai adơi ñu,” kiăng laĭ, tơlơi kiăng kơ thâo krăn hăng tŭ pơkơđiăng kơ tơlơi hiư̆m ngă đơđa mơnuih jing ană bă Ơi Adai samơ̆ đơđa mơnuih ƀu djơ̆ jing ană bă Ơi Adai ôh, jing tơlơi bruă yom biă mă tơdang Yôhan čih pơtă kơ ƀing đaŏ pơ djŏp anih. Yôhan kiăng laĭ ƀơi anai jing tơdang arăng ƀuh ƀơi tơlơi hơdip sa čô mơnuih yap ñu pô jing đaŏ kơnang kơ Yang Krist, arăng či thâo krăn yơh. Tơdang ƀing mơnuih yap gơñu pô jing ƀing đaŏ kơ Yang Krist samơ̆ hơdip hơdơ̆ng ƀôdah dŏ dơ̆ng ƀơ̆ng huă ƀu thâo krăn Ơi Adai ôh amăng tơlơi hơdip, laih anŭn hơdip đuaĭ tui hăng kơnuih soh kơnuih so lŏn tơnah đôč yơh.
(2) Ding kơna pơjao Yôhan pơhiăp kơđŏm kơtang biă mă ƀơi anai kiăng kơ ƀing đaŏ jing ƀing lŏm kơ Khua Yang laih, brơi kơ ƀing gơñu thâo hơdip tui hăng tơlơi tơpă hơnơ̆ng Ơi Adai hơmâo pha brơi laih kơ ñu tơdang ñu tŭ ju̱m Yang Krist mŭt amăng tơlơi hơdip ñu pô jing Khua Yang hăng Pô Pơklaih. Tơdang ƀing ană bă Ơi Adai, jing ƀing đaŏ, yap gơñu pô jing ƀing lŏm kơ tơlơi bơngač, samơ̆ ăt dŏ hơdip đuaĭ tui hăng kơnuih soh, sĭt ƀing gơñu hlak đuaĭ tui tơlơi bruă kơnăm mơmŏt yang sat Satan yơh. Kiăng laĭ, wơ̆t tơdah đơđa mơnuih ju̱m Yang Krist laih, jing ƀing ană bă Ơi Adai laih, jing ƀing mă bruă ba akŏ Sang Ơi Adai laih, samơ̆ ăt dŏ hơdip đuaĭ tui hăng kơnuih soh gơñu pô, jing kơnuih lŏm kơ ƀing yang sat, sĭt yơh ƀing gơñu ƀu djơ̆ jing ƀing ană bă Ơi Adai sĭt ôh. Tơlơi anŭn kiăng laĭ, tơdang ƀing gơñu ruăh gưt tui tơlơi ƀing yang sat, sĭt yơh ƀing gơñu ƀrư̆ ƀrư̆ či đuaĭ tui gưt tui tơlơi yang sat kiăng hăng git gai yơh. Tơlơi bruă phŭn kiăng kơ thâo krăn sa čô mơnuih đaŏ sĭt kơ Khua Yang mơ̆n thâo tơdah ñu khăp ƀôdah ƀu khăp ôh kơ ƀing ayŏng amai adơi đaŏ ñu. Kiăng laĭ, tơdah ñu ƀu hơmâo pran jua tơlơi pơmĭn thâo pap brơi kơ ƀing ayŏng amai adơi ƀing amĭ ama ñu laih anŭn ƀing gơyut gơyâo mơnuih re̱ng gah ñu, sĭt ñu aka jing ană bă Ơi Adai sĭt ôh.
(3) Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Khua Yang hơi, brơi kơ ƀing ta thâo pơmĭn sĭt bĕ hăng kơsem ep lăng ta pô bĕ ƀơi mông anai ƀing hlak ngă bruă đuaĭ tui Khua Yang ƀôdah đuaĭ tui yang sat. Brơi kơ ƀing ta thâo wp kơsem glaĭ pran jua tơlơi pơmĭn tơlơi hơdip ta thâo pap brơi kơ ƀing arăng mơ̆n thâo, ƀôdah ăt dŏ djă̱ pioh tơlơi hil nač ruă nuă hăng arăng laih anŭn aka ƀu kiăng pơhaih kơhma̱l hĭ ôh. Hơnŭn yơh, kiăng kơ jing ƀing ană bă Ơi Adai sĭt, brơi kơ ƀing ta thâo pap brơi tơdruă mơ̆ng pran jua ta kar hăng Ơi Adai hơmâo pap brơi laih kơ ƀing ta amăng Yang Krist. Bơni hiam.