Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget ƀing ta jing ƀing đaŏ kơnang kơ Khua Yang Yêsu khŏm tŭ hơ̆k mơak gleh tơnap hrŏm hăng Yang Krist lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ 1 Pêtrôs 4:12-13 tui hăng gah yŭ anai.
(1) Ding kơna pơjao Pêtrôs čih pơtô yom biă mă tơdang ñu laĭ tui anai, “Ơ ƀing gơyut gơyâo khăp hơi, anăm tŭ dŏ kơtuă ôh kơ tơlơi lông lăng ruă nuă ƀing gih hlak dŏ tŭ kiăng kơ lông lăng tơlơi đaŏ gih, jing kar hăng tơlơi phara truh tơl kơ ƀing gih yơh. Samơ̆ hơ̆k mơak bĕ kơ tơlơi ƀing gih tŭ hrŏm laih amăng tơlơi ruă nuă Krist, kiăng kơ ƀing gih dưi tŭ hơ̆k mơak bă blai tơdang tơlơi ang yang Ñu či tŭ pơrơđah rai yơh,” kiăng laĭ, sa čô mơnuih đaŏ kơ Yang Krist khŏm thâo sĭt kơ tơlơi ñu pô či bưp djơ̆ tơlơi lông lăng amăng tơlơi hơdip yơh, samơ̆ brơi kơ ñu anăm dŏ kơtuă ôh, yuakơ tơlơi lông lăng anŭn jing tơlơi djru brơi kơ tơlơi đaŏ ñu prŏng kơjăp tui amăng Khua Yang. Hloh kơ anŭn dơ̆ng, tơlơi lông lăng kơ tơlơi đaŏ sa čô mơnuih đuaĭ tui Khua Yang, jing sa tơlơi hơ̆k mơak prŏng yơh, yuakơ wơ̆t tơdah gleh tơnap gah kơ drơi jan samơ̆ ñu anŭn či hơmâo tơlơi kơjăp prŏng tui nanao yơh gah bơngăt mơyang ñu. Samơ̆ tơlơi hơ̆k mơak prŏng hloh jing tơlơi pô đaŏ dưi nao bưp ƀô̆ mơta Khua Yang ƀơi hrơi Khua Yang trŭn rai dơ̆ng ƀơi lŏn tơnah anai yơh.
(2) Ding kơna pơjao Pêtrôs čih tui anŭn yuakơ kiăng brơi kơ rĭm mơnuih đaŏ kơ Khua Yang thâo kơ tơlơi anai, tơdang tŭ tơlơi lông lăng tơnap gleh amăng tơlơi hơdip, sĭt Khua Yang ăt ƀu dŏ ataih lui raih hĭ ôh, samơ̆ Ñu ăt pŏk brơi hơdră jơlan kiăng kơ pô đaŏ anŭn dưi gir tŭ hăng dưi hĭ mơ̆n. Hloh kơ anŭn dơ̆ng, tơlơi lông lăng anŭn jing tơlơi pô đaŏ tŭ ruă nuă hrŏm hăng Yang Krist amăng tơlơi hơdip hơdơ̆ng đaŏ kơnang ñu pô yơh. Khua Yang kiăng kơ yap kơnăl biă mă yơh kơ hlơi pô thâo krăn tơlơi lông lăng ruă nuă anŭn jing tơlơi ñu hlak tŭ hrŏm pơgop sa hăng Khua Yang, yuakơ tơlơi ñu đaŏ kơnang kơ Yang Yêsu Krist. Sĭt yơh hơ̆k mơak tŭ ruă nuă arăng kơpĭ kơpe̱t hrŏm hơbĭt hăng Khua Yang yuakơ đaŏ kơnang kơ Ñu, jing sa bruă mơnuih đaŏ năng ngă biă mă yơh, yuakơ Khua Yang Yêsu ăt tŭ ruă nuă laih kar hăng anŭn. Khua Yang Ơi Adai nanao dŏ hrŏm hăng pơkơtang pơkơjăp kơ pô đaŏ anŭn nanao yơh tơdang tŭ gleh tơnap yuakơ anăn Khua Yang tơdang ƀing mơnuih lŏn tơnah djik djak kơhak kơčuh thâo hluh soh.
(3) Jing ƀing đaŏ kơnang kơ Yang Yêsu Krist, brơi kơ ƀing ta thâo krăn sĭt bĕ, tơlơi ƀing ta hlak dŏ tŭ ruă nuă yuakơ anăn Khua Yang jing năng kơ ƀing ta khŏm hơmâo yơh. Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Yang Krist hơi, brơi kơ ƀing ta thâo thâo krăn sĭt bĕ kơ tơlơi lông lăng kơ tơlơi đaŏ kơnang ta jing tơlơi pơkơjăp hĭ ƀing ta prŏng tui amăng Ñu nanao. Laih anŭn tơdang ƀing ta tŭ gleh tơnap yuakơ anăn Khua Yang, sĭt ƀing ta hlak tŭ hrŏm amăng tơlơi ruă nuă Yang Krist yơh. Hơnŭn yơh, brơi kơ ƀing ta hơ̆k mơak nanao bĕ amăng Khua Yang tơdang ƀing ta hlak tŭ tơlơi gleh tơnap arăng djik djak kơhak kơčuh mưč mač kơ ƀing ta. Bơni hiam.