Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget ƀing ană bă Ơi Adai khŏm khăp kơ Khua Yang Ơi Adai hăng pơpŭ bơni kơ Ñu nanan lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ Tơlơi Adoh Bơni Hơơč 91:15-16 tui hăng gah yŭ anai.
(1) Pô čih črăn Tơlơi Adoh Bơni Hơơč anai čih pơruai yom biă mă tơdang ñu laĭ tui anai, “Tơdang ñu iâu laĭ kơ Kâo, Kâo či laĭ glaĭ kơ ñu yơh, tơdang ñu dŏ amăng tơlơi rŭng răng, Kâo či dŏ hrŏm hăng ñu yơh. Kâo či pơrơngai hĭ ñu laih anŭn pơpŭ pơyom ñu yơh. Kâo či pơhrăp hĭ ñu hăng tơlơi hơdip sui, laih anŭn či pơklaih hĭ ñu yơh,” kiăng laĭ, hlơi pô khăp đuaĭ tui kơkuh pơpŭ kơ Yahweh Ơi Adai amăng tơlơi hơdip hơdơ̆ng ñu, sĭt Ơi Adai či bơni hiam kơ ñu anŭn biă mă yơh, kar hăng tơlơi laĭ glaĭ kơ tơlơi ñu kwưh rơkâo, dŏ hrŏm hăng ñu tơdang ñu bưp djơ̆ tơlơi rŭng răng amăng tơlơi hơdip yơh. Hloh kơ anŭn, Ơi Adai či pơrơngai hĭ ñu mơ̆ng tơlơi gleh tơnap laih anŭn pơpŭ pơyom kơ ñu amăng tơlơi hiam klă yơh.
(2) Pô čih črăn anai pơruai tui anŭn yuakơ ñu kiăng kơ ƀing đaŏ kơnang kơ Ơi Adai thâo krăn kơ tơlơi đuaĭ tui đaŏ kơnang kơ Ơi Adai jing tơlơi bơni hiam biă mă yơh. Kơ ƀing hlơi pô thâo kơkuh pơpŭ kơ Yahweh Ơi Adai hăng pơpŭ kơ Ñu amăng abih tơlơi hơdip, sĭt Ơi Adai či pơhrăp hĭ ñu hăng tơlơi hơdip sui ƀơi lŏn tơnah laih anŭn pơklaih hĭ ñu mơ̆ng abih bang tơlơi tơnap rŭng yơh. Kiăng laĭ, hlơi pô đuaĭ tui đaŏ kơnang kơkuh pơpŭ khăp kơ Ơi Adai sĭt nik, sĭt ñu anŭn Ơi Adai či bơni hiam bă blai yơh amăng tơlơi khăp pap pơdrŏng săh Ñu nanao.
(3) Jing ƀing đaŏ kơnang kơ Yang Yêsu, jing ană bă Ơi Adai, ƀing ta năng đaŏ kơnang kơ Khua Yang Ơi Adai nanao yơh, yuakơ anŭn yơh jing hơdră jơlan bơni hiam Ñu pha brơi kơ ƀing ană bă khăp hơeng Ñu. Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Khua Yang hơi, brơi kơ ƀing ta thâo khăp kơ Ơi Adai hăng abih tơlơi hơdip ta laih anŭn brơi kơ ƀing ta thâo krăn Ñu hăng abih jua bơngăt ta bĕ. Hơnŭn yơh, brơi kơ ƀing ta thâo khăp kơ Ñu hăng thâo krăn Ñu nanao amăng tơlơi hơdip ta. Bơni hiam.