Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget ƀing ta tŭ kơđŏm amăng tơlơi pơgop Ơi Adai jing tơlơi Ñu kiăng kơ ƀing ta ngă lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ Hêbrơ 9:20 tui hăng gah yŭ anai.
(1) Ding kơna Môseh pơtô laĭ yom biă mă kơ ƀing ană plơi Ơi Adai tui anai, “Anai jing drah kơđŏm hĭ tơlơi pơgop, jing tơlơi Ơi Adai hơmâo pơđar laih kiăng kơ ƀing gih ngă tui,” kiăng laĭ, amăng rơnŭk Tơlơi Pơgop Hơđăp Ơi Adai hơmâo pơđar laih kơ ƀing ană plơi ƀing Israel kiăng kơ pơyơr gơnam ngă yang hơmâo drah (hlô mơnơ̆ng) kiăng djai pơala brơi tơlơi soh gơñu. Rĭm thŭn ƀing gơñu khŏm ngă kar hăng anŭn, tui anŭn kăh Ơi Adai či lăng ƀơi drah hlô arăng pơyơr anŭn hăng pap brơi tơlơi soh pô pơyơr gơnam pơyơr anŭn yơh. Anŭn ăt jing tơlơi kơđŏm kơ tơlơi Ơi Adai pap brơi tơlơi soh pô pơyơr anŭn mơ̆n laih anŭn pô anŭn hơmâo tŭ pơgop pơlir hăng Ơi Adai yơh. Anŭn ăt jing tơlơi pơphrâo glaĭ tơlơi pơgop hăng Ñu amăng rĭm thŭn yơh.
(2) Môseh ruai kơ tơlơi Ơi Adai pơđar kar hăng anŭn yuakơ Ơi Adai thâo tơlơi bơni hiam klă hloh Ñu či pha brơi kơ ƀing ană plơi Ñu yơh. Tơdang ƀing hlơi pô hơmư̆ tơlơi Khua Yang pơđar hăng tui gưt ngă tui hơdôm tơlơi pơđar anŭn, sĭt ñu anŭn tŭ pơgop pơlir glaĭ hăng Khua Yang Ơi Adai yơh. Amăng rơnŭk Tơlơi Pơgop Phrâo, đaŏ kơnang kơ Yang Yêsu laih anŭn tui gưt hơdôm tơlơi Ñu pơđar jing sa tơlơi bruă yom biă mă yơh. Samơ̆ tơdang ƀing ană bă Ñu ăt dŏ kle̱p hăng Ñu laih anŭn tŏ tui ngă tui nanao tơlơi hiam klă amăng Ñu, sĭt ñu anŭn hơmâo pơrơđah kơ tơlơi pơgop pơlir ñu dŏ amăng Khua Yang yơh.
(3) Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Khua Yang hơi, brơi kơ ƀing ta thâo krăn sĭt bĕ kơ tơlơi drah Yang Krist jing tơlơi kơđŏm kơ tơlơi pơgop Ñu hăng ƀing ta. Laih anŭn brơi kơ ƀing ta thâo gưt tui nanao bĕ tơlơi pơđar yuakơ anŭn yơh jing tơlơi ƀing ta pơrơđah tơlơi khăp ta hăng Khua Yang. Hơnŭn yơh, brơi kơ ƀing ta thâo dŏ kle̱p nanao bĕ amăng tơlơi pơgop Khua Yang anŭn. Bơni hiam.