Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget ƀing ta kiăng kơ đĭ kơyar amăng Khua Yang nanao lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ 2 Hră Ruai 24:20 tui hăng gah yŭ anai.
(1) Pô pơala Ezra čih pơruai yom biă mă tơdang ñu ruai tui anai, “Giŏng anŭn, Yang Bơngăt Ơi Adai trŭn rai ƀơi Zekharyah ană đah rơkơi khua ngă yang prŏng hloh Yehôyada. Ñu tơgŭ ƀơi anăp ƀing ană plơi hăng laĭ tui anai: Anai yơh jing tơlơi Ơi Adai laĭ, ‘Yua hơget ƀing gih ƀ utui gưt tơlơi Yahweh pơđar ôh lĕ? ƀing gih ƀu či đĭ kơyar ôh. Yuakơ ƀing gih hơmâo hơngah lui hĭ laih Yahweh, Ñu ăt lui hĭ laih ƀing gih mơ̆n,’” kiăng laĭ, ƀu hơmâo tơlơi soh pă prŏng hloh ôh kơ tơlơi soh hơngah lui hĭ Yahweh Ơi Adai laih anŭn ƀu kiăng đaŏ kơnang kơkuh pơpŭ kơ Ñu dơ̆ng tah. Samơ̆ ƀơi anai ƀing ană plơi Yudah (jing ƀing dŏ gah thu̱ng lŏn čar Israel) hơmâo ngă laih kơ Ơi Adai gơñu. Kơnơ̆ng Yang Bơngăt Ơi Adai đôč yơh jing Pô dưi brơi kơ mơnuih hơmâo tơlơi khĭn pơhiăp pơkơdơ̆ng glaĭ hăng ƀing ƀu đaŏ kơnang kơ Ơi Adai.
(2) Pô pơala anai čih pơruai tui anŭn yukơ ñu kiăng kơ pơhiăp kơđŏm yom biă mă kơ tơlơi ƀu tui gưt tơlơi Yahweh pơđar jing ƀu či hơmâo tơlơi đĭ kơyar ôh. Anŭn jing tơlơi đĭ kơyar amăng tơlơi thâo hluh thâo krăn Ơi Adai, dưi dŏ ƀơi anăp tơlơi khăp pap hiam klă Ñu nanao. Hloh kơ anŭn dơ̆ng, Khua Yang Ơi Adai ăt či wai lăng pơgang brơi hăng brơi kơ tơlơi rơbeh bă blai hăng hiam drơi jan nanao mơ̆n gah kơđeh asar. Ơi Adai jing Pô prŏng glông hloh kơ abih bang laih anŭn kơnơ̆ng hơjăn Ñu đôč yơh jing Yahweh Ơi Adai kơ abih bang djuai mơnơ̆ng. Tơdang ƀing ană plơi Ñu hơngah lui hĭ Ñu, sĭt Ñu ăt hơngah lui hĭ mơ̆n ƀing gơ̆, ƀu djơ̆ Ñu rŭ̱ nua pơkơdơ̆ng glaĭ ôh, tơdah Ñu rŭ̱ nua ăt jing djơ̆ mơ̆n, samơ̆ Ñu ăt pơpŭ pơyom kơ ƀing gơñu kơ tơlơi ƀing gơñu hơmâo ruah mă laih. Hlơi pô đuaĭ tui đaŏ kơnang kơ Yahweh, sĭt ñu anŭn ăt khŏm gưt tui tơlơi Ñu pơđar mơ̆n kiăng kơ tŭ mă tơlơi đĭ kơyar bă blai nanao amăng Ñu.
(3) Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Yang Krist hơi, brơi kơ ƀing ta thâo đaŏ kơnang đuaĭ tui Khua Yang nanao bĕ amăng abih tơlơi hơdip ta. Brơi kơ ƀing ta thâo ruah mă hơdră jơlan thâo pơmơak kơ Ơi Adai ta tơdang ƀing ta gưt tui tơlơi Ñu pơđar hăng thâo huĭ pơpŭ kơ Ñu amăng abih anih hơdip ta. Brơi kơ ƀing ta thâo ăh hơĭn đaŏ kơnang kơjăp amăng Khua Yang hăng rơkâo Yang Bơngăt Hiam pơbă hĭ ƀing ta rĭm hrơi bĕ, yuakơ kơnơ̆ng hơjăn Ñu đôč yơh dưi pơphrâo hĭ jua pơmĭn tơlơi hơdip ta nanao rĭm hrơi. Hơnŭn yơh, brơi kơ ƀing ta thâo tŭ đĭ kơyar amăng Khua Yang nanao bĕ. Bơni hiam.