Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget ƀing ta khŏm hơdơr gưt tui hơdôm tơlơi ƀing ding kơna pơjao Khua Yang pơtô pơhrăm lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Yang Krist. Anai jing tơlơi laĭ glaĭ kơ Yud 1:17 tui hăng gah yŭ anai.
(1) Ding kơna Yud čih pơruai yom biă mă tơdang ñu pơtă pơtăn kơ ƀing đaŏ kơ Yang Krist tui anai, “Samơ̆, Ơ ƀing gơyut gơyâo khăp hơi, hơdơr bĕ hơdôm tơlơi ƀing ding kơna pơjao Khua Yang Yêsu Krist ta laĭ lui hlâo laih,” kiăng laĭ, wơ̆t tơdah tơlơi truh sat ƀai amăng rơnŭk hơnăl tuč kiăng kơ pơlŭk lăk hĭ tơlơi pơtô sĭt Khua Yang, samơ̆ Yud iâu mơthưr kơ ƀing đaŏ brơi thâo dŏ kơjăp amăng Khua Yang. Kiăng kơ dŏ kơjăp hơđơ̆ng amăng tơlơi đaŏ sĭt, rĭm čô ƀing đaŏ khŏm hơmư̆ tui ngă tui hơdôm tơlơi pơtô pơhrăm ƀing ding kơna Yang Yêsu, jing ƀing ding kơna pơjao, hơmâo pơtô pơhiăp pơtŭm glaĭ abih bang tơrăk (tơlơi yom pơphan răk pioh) yom sĭt amăng tơlơi đaŏ kơnang kơ Khua Yang Yêsu yơh.
(2) Ding kơna Yud čih tui anŭn yuakơ ñu ƀuh hơmâo lu biă mă ƀing đaŏ kơ Khua Yang samơ̆ đuaĭ jrôk hĭ jơlan, kiăng laĭ, lui wir hĭ ƀu kiăng đaŏ kơnang đuaĭ tui tơlơi sĭt amăng tơlơi đaŏ kơnang kơ Yang Yêsu dơ̆ng tah. Tui anŭn, Tơlơi Pơthâo Hiam Yang Krist jing yom biă mă yơh, jing tơlơi pơthâo kơ abih bang mơnuih kiăng kơ đaŏ kơnang kơ tơlơi Yang Yêsu hơmâo trŭn rai laih ƀơi lŏn tơnah anai hăng drơi jan mơnuih, tŭ djai ƀơi kơyâo bơrơkal laih anŭn tŭ hơdip glaĭ ƀơi hrơi tal klâo hăng đĭ glaĭ pơ adai adih. Sa hrơi pơanăp anai dơ̆ng, Ñu či trŭn rai ƀơi lŏn tơnah anai kiăng kơ tŭ ju̱m abih bang ƀing hlơi pô đaŏ kơnang dŏ kle̱p pơgop pơlir hơnơ̆ng sa amăng Ñu yơh.
(3) Jing ƀing đaŏ kơnang kơ Yang Yêsu Krist, ƀing ta jing ƀing ană bă lŏm kơ tơlơi bơngač laih yơh. Tui anŭn, Ơ ƀing met anŏng ayŏng adơi ơi yă ană amôn khăp hơeng hơi, brơi kơ ƀing ta thâo hơdơr hơmư̆ tui bĕ hơdôm tơlơi Khua Yang pơtô mơ̆ng ƀing ding kơna Ñu đưm hlâo adih, jing hơdôm tơlơi laĭ lui hlâo tơlơi či truh amăng rơnŭk hơnăl tuč anai. Brơi kơ ƀing ta thâo gưt tui hơdôm tơlơi Khua Yang pơtô kơ ƀing ta kiăng kơ rŭ̱ pơdơ̆ng đĭ ta pô amăng tơlơi đaŏ kơnang rơgoh hiam hloh laih anŭn thâo iâu laĭ amăng Yang Bơngăt Hiam. Hơnŭn yơh, brơi kơ ƀing ta thâo đuaĭ tui tơlơi Khua Yang pơtô pơhrăm kơ ƀing ta nanao bĕ amăng tơlơi hơdip đaŏ kơnang kơ Ñu. Bơni hiam.