Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget ƀing ta khŏm nao jĕ pơ grê pơtao tơlơi khăp pap Ơi Adai lĕ?
LAĬ GLAĬ: Kơkuh kơ abih bang ƀing met anong ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ Hêbrơ 4:16 tui hăng gah yŭ anai.
(1) Pô čih hră Hêbrơ čih pơruai yom biă mă tơdang ñu laĭ tui anai, “Tui anŭn, brơi kơ ƀing ta nao jĕ bĕ grê pơtao tơlơi khăp pap hăng tơlơi kơjăp kơnang, kiăng kơ ƀing ta dưi tŭ mă tơlơi pap hăng dưi hơduah ƀuh tơlơi khăp pap kiăng kơ djru ƀing ta amăng mông ƀing ta kơƀah kiăng yơh,” kiăng laĭ, rĭm čô pô đaŏ brơi nao jĕ ƀơi grê pơtao tơlơi khăp pap hăng tơlơi iâu laĭ jing yom biă mă yơh, yuakơ kơnơ̆ng ƀing đaŏ kơ Yang Yêsu đôč yơh dưi hơmâo jua pơmĭn kơjăp kơnang rơnŭk hơđơ̆ng. Tơdang ƀing đaŏ nao jĕ ƀơi grê pơtao tơlơi khăp pap Ơi Adai, sĭt ƀing gơñu či tŭ mă tơlơi pap hăng tơlơi dưi hơduah ƀuh tơlơi khăp pap anŭn yơh, boh nik ñu ƀơi mông ƀing gơñu hlak dŏ kơƀah kiăng kơ tơlơi djru gah bơngăt mơyang.
(2) Pô čih hră anai pơhiăp kơđŏm yom yơh yuakơ tơdang ƀing đaŏ nao jĕ ƀơi grê pơtao Ơi Adai, kiăng laĭ, ƀơi anăp mơta Ơi Adai, sĭt či hơmâo tơlơi khăp pap yom prŏng yơh. Samơ̆ tơdah ƀing aka ƀu đaŏ nao ƀơi grê pơtao Ơi Adai, sĭt či mưn ƀuh kơnơ̆ng tơlơi ƀrŭk hil phat kơđi đôč yơh. Tơdang ƀing đaŏ kơƀah kiăng gah bơngăt, sĭt ƀing gơñu dưi đuaĭ nao pơ Ơi Adai Ama hăng tơlơi iâu laĭ kwưh rơkâo iâu laĭ kơ tơlơi khăp pap yơ. Samơ̆ tơdang ƀing mơnuih ƀu đaŏ ôh kơ Yang Yêsu, ƀing gơñu ƀu hơmâo tơlơi mơyŭn dưi nao jĕ ƀơi grê pơtao Ơi Adai ôh. Brơi thâo sĭt bĕ, Ơi Adai Ama nanao pơmĭn ƀlơ̆ng brơi kơ ƀing ană bă ană plơi Ñu kiăng kơ pha brơi tơlơi mơyŭn hiam laih anŭn gŭm djru brơi kơ ƀing gơ̆ kiăng kơ gir tŭ abih bang tơlơi gleh tơnap tơdang ƀing gơ̆ bưp djơ̆ yơh.
(3) Jing ƀing ană bă Ơi Adai, brơi kơ ƀing ta thâo kwưh rơkâo iâu laĭ nanao bĕ hăng Ơi Adai kiăng kơ ƀing ta dưi dŏ hơđơ̆ng kơjăp amăng tơlơi ƀing ta đaŏ kơnang kơ Ñu. Tui anŭn, Ơ ƀing met anŏng ayŏng adơi ơi yă ană amôn khăp hơeng hơi, brơi kơ ƀing ta thâo jao brơi kơ Ñu abih bang tơlơi ƀlơ̆ng bơngơ̆t ta kơ Ñu bĕ, yuakơ Ñu jing Pô juăt răk rong ƀing ta nanao. Brơi kơ ƀing ta anăm wơr bĭt hĭ ôh kơ tơlơi Ơi Adai Ama nanao dŏ tơguăn ƀing ta nao kơnang ƀơi Ñu. Hơnŭn yơh, brơi kơ ƀing ta thâo nao jĕ nanao bĕ ƀơi grê pơtao tơlơi khăp pap Ơi Adai kiăng kơ tŭ pơkơtang hăng dŏ kơjăp amăng hrơi mông bưp djơ̆ angĭn rơbŭ kơthel amăng tơlơi hơdip. Bơni hiam.