Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget Yang Yêsu laĭ kơ tơlơi mơyŭn mơak yơh kơ ƀing hlơi pô bŏh hĭ khul ao phyung gơñu kiăng mŭt pơ amăng ja̱ng plơi hơmâo kơyâo tơlơi hơdip lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ Pơrơđah 22:12-14 tui hăng gah yŭ anai.
(1) Ding kơna pơjao Yôhan čih pơruai yom biă mă tơdang ñu ruai glaĭ tơlơi Yang Yêsu pơtă tui anai, “Lăng bĕ, Kâo či rai tañ biă mă yơh! Kâo či rai djă̱ ba gơnam bơni Kâo hrŏm hăng Kâo laih anŭn či pha brơi kơ rĭm čô tui hăng tơlơi bruă rĭm čô hơmâo ngă laih yơh. Kâo jing Alpha laih anŭn Omega, jing Pô Blung Hlâo laih anŭn Pô Hơnăl Tuč, jing Pô Čơdơ̆ng laih anŭn Pô Pơđŭt yơh. Mơyŭn mơak yơh kơ ƀing hlơi pô bŏh hĭ khul ao phyung gơñu, kiăng kơ ƀing gơñu dưi nao pơ kơyâo tơlơi hơdip laih anŭn dưi găn khul amăng ja̱ng mŭt pơ plơi anŭn,” kiăng laĭ, ƀu hơmâo tơlơi mơyŭn mơak pơkŏn dơ̆ng tah jing mơak mơai hloh ƀơi mông dưi bưp Khua Yang Yêsu hăng tŭ mă gơnam bơni mơ̆ng Ñu, yuakơ Ñu či rai pha brơi tơlơi bơni tui hăng tơlơi bruă rĭm čô ƀing đaŏ ngă yơh. Hloh kơ anŭn dơ̆ng, Yang Yêsu jing Ơi Adai, jing Pô Hrih Pơjing, jing Pô Hơdŏ Nanao, jing Pô hơdŏ hlâo kơ abih bang tơlơi mơnơ̆ng, wơ̆t tơdah abih bang či rơgao hĭ samơ̆ Khua Yang ăt hơdŏ nanao. Ñu jing Pô pơphŭn Pô pơjing rai laih anŭn Ñu ăt jing Pô či pơđŭt hĭ, pơrai hĭ abih bang tơlơi mơnơ̆ng yơh.
(2) Ding kơna pơjao Yôhan čih pơruai glaĭ tui anŭn yuakơ ñu ƀuh Khua Yang pơtă kơ abih bang ƀing đaŏ khŏm bŏh hĭ khul ao phyung gơñu, kiăng laĭ, tơlơi ƀing đaŏ khŏm hơdip hơdơ̆ng tui hăng tơlơi Khua Yang kiăng. Đaŏ kơnang kơ Khua Yang samơ̆ hơngah ƀu kiăng ngă tui ôh jing tơlơi ƀu phara ôh hăng ƀing aka ƀu đaŏ, năng ai či jing sat hloh kơ ƀing aka ƀu đaŏ yơh, yuakơ ñu thâo laih samơ̆ ƀu kiăng ngă tui. Tơdang ƀing đaŏ thâo hơdip hơdơ̆ng “nao bŏh hĭ ao phyung” gơñu, tŭ ju̱m Khua Yang hăng ngă tui tơlơi Khua Yang kiăng, sĭt ƀing gơñu či dưi găn amăng ja̱ng mŭt nao pơ plơi tơlơi hơdip yơh.
(3) Jing ƀing đaŏ kơnang kơ Yang Yêsu, ƀing ta khŏm thâo ngă tui, hla̱ tui, hơdip hơdơ̆ng đuaĭ tui hăng tơlơi Khua Yang kiăng, yuakơ anŭn jing tơlơi Ơi Adai kiăng kơ rĭm čô ƀing đaŏ khŏm ngă tui yơh. Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Khua Yang hơi, brơi kơ ƀing ta thâo đaŏ kơnang kơ Khua Yang Yêsu jing Ơi Adai ăt jing Pô Phŭn kơ abih bang tơlơi hiam klă laih anŭn jao pơyơr bĕ ta pô kơ Ñu kiăng kơ git gai, yuakơ Ñu či pha brơi gơnam bơni tui hăng tơlơi bruă ƀing ta ngă yơh. Hơnŭn yơh, tŭ mơyŭn mơak hăng jing bĕ ƀing thâo mŭt nao pơ amăng ja̱ng kiăng nao pơ phŭn kơyâo tơlơi hơdip amăng Plơi Hiam Ơi Adai. Bơni hiam.