Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget ƀing Israel tŭ lông lăng laih anŭn Ơi Adai laĭ glaĭ kơ tơlơi gleh tơnap gơñu lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ Tơlơi Adoh Bơni Hơơč 81:7 tui hăng gah yŭ anai.
(1) Asap adoh bơni kơ Ơi Adai yom biă mă tơdang ñu pơruai hơdôm tơlơi ƀing Israel hơmâo găn laih hlâo adih tui anai, “Tơdang ƀing gih dŏ amăng tơlơi rŭng răng, ƀing gih iâu đĭ kơ Kâo tui anŭn Kâo pơklaih hĭ ƀing gih laih. Mơ̆ng amăng rơbŭ kơthel yơh, Kâo laĭ glaĭ kơ ƀing gih. Tơdơi kơ anŭn, Kâo lông lăng laih tơlơi đaŏ ƀing gih ƀơi phŭn ia Meribah,” kiăng laĭ, ƀing ană bă Ơi Adai jing ƀing Israel tơdang dŏ amăng tơlơi rŭng răng yuakơ arăng kơsung pơblah ƀôdah dŏ amăng tơlơi gleh tơnap ư̆ rơpa, tơdang ƀing gơñu rơkâo kwưh, Yahweh Ơi Adai yơh laĭ glaĭ kơ ƀing gơñu, yuakơ ƀing gơñu jing ƀing ană plơi lŏm kơ Ñu. Tơdang ƀing gơ̆ dŏ amăng tơlơi rơbŭ kơthel kơtang, ăt ƀơi mông anŭn mơ̆n Yahweh Ơi Adai pơhiăp laĭ glaĭ kơ ƀing gơ̆. Sĭt yơh, Yahweh Ơi Adai ƀu či lui brơi kơ ƀing ană plơi Ñu dŏ hiăl măl hơjăn păn ôh, samơ̆ gŭm djru kơ ƀing gơ̆ nanao yơh tơdang bưp djơ̆ tơlơi tơnap tap truh.
(2) Asap ăt adoh bơni kơ Ơi Adai mơ̆n kơ tơlơi tơdang Ơi Adai lông lăng ƀing ană bă Ñu, Ñu kiăng kơ ƀing gơ̆ prŏng tui nanao yơh amăng tơlơi thâo đaŏ kơnang jao pơyơr pô kơ Khua Yang. Đưm hlâo adih, ƀing Israel tơdang bưp djơ̆ anih ƀu hơmâo ia mơñum, ƀing gơñu pơhiăp brŏk ƀuăh kơ Môseh hăng Ơi Adai yơh. Tơdang ƀing gơñu bưp djơ̆ anih hơdip tơnap kơƀah ia kar hăng anŭn, djơ̆ biă mă ñu, ƀing gơñu kơnơ̆ng kwưh rơkâo, samơ̆ ƀing gơñu ƀrŭk hil kreñ nač kơ Ơi Adai laih anŭn kơ pô mă bruă kơ Ơi Adai, tơl ngă brơi kơ Ơi Adai hil biă mă yơh. Tơdang bưp djơ̆ tơlơi kơƀah kiăng, ƀing Israel ƀu djơ̆ kơnơ̆ng rơkâo đôč ôh, samơ̆ hơmâo tơlơi hil nač nao hrŏm hăng tơlơi rơkâo wơ̆t hăng tơlơi brŏk ƀuăh mơ̆n. Anŭn jing tơlơi ngă brơi kơ Ơi Adai ƀu mơak biă mă yơh.
(3) Jing ƀing đaŏ kơnang kơ Yang Yêsu Krist, ƀing ta jing ƀing ană bă Ơi Adai, brơi kơ ƀing ta thâo đaŏ kơnang kơ Khua Yang amăng abih anih hơdip ta, wơ̆t tơdah mơak ƀôdah rơngot, wơ̆t tơdah djŏp ƀôdah kơƀah. Tui anŭn, Ơ ƀing met anŏng ayŏng adơi ơi yă ană amôn khăp hơeng hơi, brơi kơ ƀing ta thâo kwưh rơkâo iâu laĭ Ơi Adai hăng jao pơyơr kơ Ñu abih bang tơlơi ƀing ta ƀlơ̆ng bơngơ̆t yuakơ Ñu yơh jing Pô juăt răk rong răk wai ƀing ta nanao. Hloh kơ anŭn dơ̆ng, yuakơ ƀing ta lŏm kơ Ñu, jing ƀing ană bă ană plơi pla Ñu, sĭt Ñu ƀu či lui raih hĭ ƀing ta dŏ hiăl măl hơjăn păn ôh, samơ̆ Ñu či laĭ glaĭ hăng rai djru pơklaih hĭ ƀing ta yơh. Hơnŭn yơh, brơi kơ ƀing ta thâo đaŏ kơnang jao pơyơr kơ Ñu nanao bĕ. Bơni hiam.