Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget hơmâo lu mơnuih ră ruai pơhing hyu hiam klă kơ tơlơi ƀing đaŏ plơi Thessalonikê lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ 1 Thessalonikê 1:9 tui hăng gah yŭ anai.
(1) Ding kơna pơjao Paul čih pơtô yom biă mă tơdang ñu laĭ tui anai, “yuakơ ƀing mơnuih amăng kwar anŭn hơmâo pơrơđah rơđah rơđo̱ng laih kơ tơlơi tŭ ju̱m klă djrưng ƀing gih ngă laih kơ ƀing gơmơi; ƀing gơñu pơruai hiư̆m ƀing gih wơ̆t glaĭ pơ Ơi Adai mơ̆ng tơlơi kơkuh pơpŭ kơ khul rup trah kiăng kơ mă bruă kơkuh pơpŭ kơ Ơi Adai hơdip hăng sĭt,” kiăng laĭ, Paul pơhơdơr kơ ƀing đaŏ plơi Thessalonikê kơ tơlơi ƀing gơñu hơmâo ngă hĭ laih tơlơi đaŏ kơnang kơ khul rup trah laih anŭn ră anai ƀing gơñu hlak đuaĭ tui đaŏ kơnang kơ Yang Yêsu Krist, jing Ơi Adai hơdip hăng sĭt kơ tơlơi hơdip gơñu pô. Tơlơi bruă ƀing gơñu hlak ngă anŭn jing yom biă mă tơl hơmâo lu mơnuih ră ruai pơư pơang hyu kơ tơlơi đaŏ ƀing ană plơi Thessalonikê hơmâo ngă laih.
(2) Tơdang ƀing ană plơi Thessalonikê thâo krăn kơ Yang Yêsu Krist jing Ơi Adai sĭt hăng hơdip, ƀing gơñu hơngah lui hĭ khul rup trah yang rơba̱ng ƀing gơñu juăt đaŏ kơnang hlâo, kiăng kơ đuaĭ tơklaih rơngai hĭ mơ̆ng tơlơi phat kơđi prŏng, jing tơlơi Ơi Adai hil ƀrŭk sa hrơi tơdơi yơh. Hloh kơ anŭn dơ̆ng, ƀing đaŏ ană plơi Thessalonikê ngă tơlơi hơmutu hiam biă mă tơdang ƀing gơñu djru kơ ƀing Paul kiăng kơ dưi đuaĭ hyu pơlar Tơlơi Pơthâo Hiam kơ tar ƀar anih mơ̆n, yuakơ ƀing gơñu hơmâo ju̱m mă laih boh hiăp Ơi Adai hăng tơlơi mơak mơai Yang Bơngăt Hiam pha brơi kơ ƀing gơñu.
(3) Jing ƀing đaŏ kơnang kơ Yang Yêsu Krist, brơi kơ ƀing ta thâo hơmâo bĕ kơnuih mă bruă kơ Khua Yang Ơi Adai ta kar hăng ƀing ayŏng amai adơi đaŏ plơi Thessalonikê hơmâo laih hlâo adih. Sĭt yơh ƀing gơñu ƀu djơ̆ kơnơ̆ng đaŏ kơnang kơ Ơi Adai hơdip hăng sĭt đôč ôh, samơ̆ ăt thâo mă bruă hrŏm hơbĭt hăng ƀing ding kơna Ơi Adai kiăng kơ pơlar Tơlơi Pơthâo Hiam kơ djŏp anih mơ̆n. Tui anŭn, Ơ ƀing met anŏng ayŏng adơi ơi yă ană amôn khăp hơeng amăng hơi, brơi kơ ƀing ta thâo hơngah lui hĭ bĕ abih bang rup trah amăng tơlơi hơdip ta hăng tŭ ju̱m đaŏ kơnang kiăng kơ thâo mă bruă sĭt nik kơ Khua Yang bĕ. Hơnŭn yơh, brơi kơ ƀing ta thâo jing bĕ tơlơi hơmutu hiam kơ ƀing ayŏng amai adơi đaŏ ta nanao. Bơni hiam.