Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget ƀing đaŏ khŏm hơdip tui hăng tơlơi sĭt amăng Yang Yêsu lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ Ephesos 4:21 tui hăng gah yŭ anai.
(1) Ding kơna pơjao Paul čih pơtô yom biă mă tơdang ñu pơtă kơ ƀing đaŏ plơi Ephesos tui anai, “Sĭt yơh, ƀing gih hơmư̆ laih kơ tơlơi Ñu, laih anŭn arăng pơtô ƀing gih kơ tơlơi Ñ utui hăng tơlơi sĭt amăng Yang Yêsu,” kiăng laĭ, Paul pơtă pơtăn kơ ƀing đaŏ plơi Ephesos anăm ngă hla̱ tui lu ƀing mơnuih aka ƀu đaŏ ƀôdah ƀing đaŏ ƀu thâo krăn Yang Yêsu ngă ôh, yuakơ ƀing gơñu ngă tơlơi sat ƀai ƀu thâo mlâo ôh. Abih bang ƀing anŭn đuaĭ tui kơnuih soh kơnuih so gơñu pô amoaih kiăng đôč yơh, anŭn jing mơ̆ng khul tơlơi amoaih kluh pleč ƀlŏr kơnuih so mơnuih mơnam đôč yơh. Tơdang ƀing đaŏ ăt hơdip tui hăng kơnuih so gơñu, sĭt ƀing gơñu aka ƀu tŭ tokeng dơ̆ng kơ phrâo ôh laih anŭn ƀing gơñu ăt dŏ amăng tơlơi kơnăm mơmŏt đôč yơh.
(2) Ding kơna pơjao Paul čih pơtă tui anŭn yuakơ ñu kiăng kơ ƀing đaŏ plơi Ephesos thâo krăn Yang Krist hăng hơdip pơgop sa dŏ kle̱p amăng Ñu nanao tui hăng tơlơi Pơthâo Hiam ƀing Paul hơmâo pơtô pơhrăm laih kơ ƀing gơñu. Hlơi pô hơdip amăng tơlơi kơnăm mơmŏt, sĭt ñu anŭn ƀu hơmâo tơlơi sĭt Khua Yang dŏ amăng ñu ôh. Kơđai glaĭ, tơdah hlơi pô kiăng kơ hơdip hiam klă ƀơi anăp Ơi Adai, ñu anŭn khŏm kiăng kơ tŭ pơphrâo amăng kơnuih laih anŭn amăng pran jua tơlơi pơmĭn yơh. Ñu anŭn khŏm čut hơô kơnuih phrâo Ơi Adai pơjing kiăng kơ tŭ hrup hăng Khua Yang nanao amăng tơlơi tơpă hơnơ̆ng sĭt laih anŭn amăng tơlơi rơgoh hiam hlo̱m sĭt.
(3) Jing ƀing ană bă Ơi Adai, brơi kơ ƀing ta thâo hơmâo bĕ kơnuih hiam klă kar hăng ding kơna pơjao Paul hơmâo pơtrŭt laih kơ ƀing đaŏ kiăng kơ hơmâo. Brơi kơ ƀing ta tŭ pơphrâo nanao bĕ amăng jua pơmĭn amăng tơlơi hơdip hơdơ̆ng ta. Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Yang Krist hơi, brơi kơ ƀing ta thâo hơmư̆ tui tơlơi Khua Yang pơtô kơ ƀing ta rĭm hrơi bĕ. Brơi kơ ƀing ta hla̱ tui kơnuih phrâo Khua Yang amăng ta nanao bĕ kiăng kơ hơdip djơ̆ tui hăng tơlơi Ơi Adai kiăng. Hơnŭn yơh, brơi kơ ƀing ta thâo hơdip tui hăng tơlơi sĭt amăng Khua Yang nanao bĕ. Bơni hiam.