Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget Yang Yêsu pơtă kơ ƀing đaŏ kiăng kơ thâo khăp bĕ kơ ƀing rŏh ayăt laih anŭn iâu laĭ bĕ kơ ƀing ngă sat kơpĭ kơpe̱t kơ ƀing gơ̆ lĕ?
LAĬ GLAĬ: LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ Mathiơ 5:44 tui hăng gah yŭ anai.
(1) Mathiơ čih pơruai glaĭ yom biă mă tơdang ñu ruai kơ tơlơi Yang Yêsu pơtô tui anai, “Khăp bĕ kơ ƀing rŏh ayăt gih laih anŭn iâu laĭ Ơi Adai bĕ kơ ƀing mưč mač kơpĭ kơpe̱t kơ ƀing gih,” kiăng laĭ, Yang Yêsu pơtă kơ ƀing đaŏ kơnang kơ Ñu brơi thâo khăp kơ ƀing rŏh ayăt, brơi thâo anăm hil, pơrơmut, rŭ nua ƀơi ƀing rŏh ayăt ôh, anăm khŏn ngă sat glaĭ kơ ƀing hlơi pô ngă sat laih kơ ƀing ta ôh. Yuakơ ƀing rŏh ayăt, ƀing ngă sat kơpĭ kơpe̱t wơ̆t hăng ƀing mưč mač jing ƀing juăt pơruă hĭ arăng, ƀu hơmâo tơlơi mơak klă hơget ôh mơ̆ng ƀing gơñu.
(2) Hloh kơ anŭn dơ̆ng, Yang Yêsu ƀu kiăng ôh kơ ƀing ană bă Ơi Adai hơmâo jua pơmĭn pơrơmut laih anŭn tơlơi hơdip pơkơdơ̆ng glaĭ hăng ƀing rŏh ayăt, yuakơ Ñu kiăng kơ ƀing ană bă Ñu rơngai hĭ mơ̆ng tơlơi ruă phĭ̱ amăng jua pơmĭn laih anŭn ƀu djă̱ pioh ôh tơlơi khŏn amăng tơlơi hơdip. Laih anŭn dơ̆ng, tơdang thâo khăp pap hăng iâu laĭ kơ ƀing ngă sat kơpĭ kơpe̱t, ƀing ană bă Ơi Adai či hơmâo mông mơyŭn kiăng kơ dưi ngă gơ̆ng jơlan ră ruai tơlơi pơthâo hiam kơ ƀing aka ƀu thâo krăn Yang Krist yơh.
(3) Jing ƀing đaŏ kơnang kơ Yang Yêsu Krist, brơi kơ ƀing ta thâo tŭ ju̱m tơlơi pơtô pơhrăm Yang Yêsu hơmâo pơtô pơhrăm laih kơ ƀing ta kiăng kơ thâo khăp kơ ƀing rŏh ayăt hăng iâu laĭ kơ ƀing ngă sat kơpĭ kơpe̱t kơ ƀing ta. Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Yang Krist hơi, brơi kơ ƀing ta thâo hơdip tơdu rơun amăng Khua Yang kiăng kơ hơdip tui hăng tơlơi Khua Yang pơđar. Hơnŭn yơh, brơi kơ ƀing ta thâo khăp hăng iâu laĭ nanao bĕ kơ ƀing hlơi pô ngă sat kơpĭ kơpe̱t kơ ƀing ta, yuakơ tơlơi bơni hiam Ơi Adai jing prŏng prin biă mă kơ ƀing hlơi pô thâo ngă tui tơlơi Ñu kiăng. Bơni hiam.