Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget mơnuih mơnam ƀu dưi pơthăm hĭ tơlơi khăp laih anŭn kŏn dưi mă pơđuaĭ hĭ lơi tơlơi khăp lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Yang Krist. Anai jing tơlơi laĭ glaĭ kơ Tơlơi Adoh Hiam 8:7 tui hăng gah yŭ anai.
(1) Pơtao Solomôn čih pơruai glaĭ kơ tơlơi khăp hiam klă yom biă mă yơh tui anai, “Ia lu ƀu dưi pơthăm hĭ tơlơi khăp ôh; khul ia krong kŏn dưi đu̱ng pơđuaĭ hĭ ñu lơi. Tơdah hlơi pô mă abih bang mŭj dram sang ñu kiăng blơi mă tơlơi khăp, sĭt pô đah kơmơi či djik djak hĭ kơ tơlơi khăp anŭn biă mă yơh,” kiăng laĭ, tơlơi khăp tŏng krah dua tơdăm dra jing yom biă mă yơh, tơl ia ƀu dưi pơthăm hĭ apui tơlơi khăp anŭn tơl krong ƀu dưi đung pơđuaĭ hĭ tơlơi kơtraŏ tơlơi khăp anŭn lơi. Hơmâo mơnuih laĭ: Tơlơi khăp rai kâo ƀu thâo ƀuh ôh, tơlơi khăp đuaĭ kâo kŏn thâo ƀuăn lơi. Tơlơi khăp Ơi Adai hơmâo pioh lui laih amăng kơnuih mơnuih mơnam ta dưi hơmâo yuakơ Ñu jing phŭn kơ tơlơi khăp. Samơ̆ đơđa mơnuih mơnam ta khăp kơ tơlơi ngă soh sat lu hloh.
(2) Pô čih hră anai ăt pơrơklah mơ̆n kơ tơlơi tơdah hlơi pô mă abih bang mŭk dram sang ñu kiăng kơ blơi mă tơlơi khăp anŭn, sĭt nik ƀu yom hăng tŭ yua ôh. Tơdah sa čô tơdăm mă mŭk dram ñu, prăk mah ñu kiăng kơ blơi mă tơlơi khăp mơ̆ng đah kơmơi ƀôdah tơlơi khăp kơ tơdruă, sĭt gah kơ đah kơmơi, ñu či klao djik mưč yơh yuakơ pô đah kơmơi anŭn ƀu thâo krăn ôh hơget tơlơi khăp jing. Tơlơi khăp ƀu dưi blơi mă hăng prăk ôh, samơ̆ tơlơi khăp sĭt jing mơ̆ng pran jua tơlơi pơmĭn mơnuih laih anŭn mơ̆ng Ơi Adai yơh. Tơlơi anai kiăng kơčrâo nao pơ tơlơi khăp Ơi Adai khăp laih kơ mơnuih mơnam ta tơl Ñu brơi rai Ană Ñu kơnơ̆ng Ha Čô, kiăng kơ hlơi pô tŭ ju̱m Ană anŭn, ñu anŭn či dŏ hơdip hlŏng lar hăng Ơi Adai pơ Plơi Hiam yơh. Sĭt yơh, ƀu hơmâo hlơi pô ôh dưi pơčơlah hĭ ƀing ană bă Ơi Adai mơ̆ng tơlơi khăp Ơi Adai.
(3) Jing ƀing đaŏ kơnang kơ Khua Yang Yêsu laih anŭn jing ană bă Ơi Adai laih, brơi kơ ƀing ta pơmĭn ƀlơ̆ng nao kơ tơlơi khăp Khua Yang Ơi Adai hơmâo pha brơi kơ ƀing ta bĕ. Tơlơi khăp Ơi Adai jing hlŏng lar laih anŭn tơlơi khăp pap Ñu dŏ nanao hlŏng lar. Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Yang Krist hơi, brơi kơ ƀing ta thâo hrăm tui tơlơi khăp Ơi Adai bĕ. Tơlơi khăp Ơi Adai ƀu hơmâo hlơi pô dưi pơrai hĭ ôh, kiăng laĭ, Ñu khăp kơ ƀing ta nanao hlŏng lar. Brơi kơ ƀing ta ăt thâo khăp bĕ kơ Ñu amang abih tơlơi hơdip ta. Sĭt yơh ƀing ta ƀu thâo blơi mă tơlơi khăp Ơi Adai hăng prăk mah hăng bruă hiam ta ôh, samơ̆ ƀing ta či tŭ mă đôč đač yua mơ̆ng tơlơi bruă Yang Yêsu djai ƀơi kơyâo bơrơkal yơh. Hloh kơ anŭn dơ̆ng, brơi kơ ƀing ta thâo yap kơnăl bĕ tơlơi bruă Khua Yang anŭn amăng tơlơi hơdip ta nanao. Hơnŭn yơh, brơi kơ ƀing ta thâo khăp bĕ kơ tơdruă kar hăng Yang Yêsu hơmâo khăp laih kơ ƀing ta.