Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget Yahweh Ơi Adai hơmư̆ tơlơi iâu laĭ mơnuih tơpă hơnơ̆ng samơ̆ Ñu ngă amơ̱ng kơ tơlơi iâu kwưh mơnuih sat ƀai lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ Pơrơtưh 15:29 tui hăng gah yŭ anai.
(1) Pơtô Solomôn čih pơtô yom biă mă tơdang ñu laĭ tui anai, “Yahweh hơmư̆ tơlơi iâu laĭ mơnuih tơpă hơnơ̆ng, samơ̆ Ñu ngă amơ̱ng kơ tơlơi iâu kwưh mơnuih sat ƀai,” kiăng laĭ, mơnuih tơpă hơnơ̆ng jing ƀing lŏm kơ Ơi Adai yuakơ Ñu tŭ đaŏ hăng gưt tui tơlơi Khua Yang kiăng. Samơ̆ ƀing mơnuih sat ƀai jing ƀing ngă soh pơkơdơ̆ng glaĭ hăng tơlơi phiăn tơlơi juăt Ơi Adai laih anŭn ƀu tui gưt kơ Ơi Adai ôh amăng tơlơi bruă ƀing gơñu ngă. Kiăng laĭ, ƀing mơnuih sat ƀai jing ƀing ngă khua kơ gơñu pô laih anŭn đuaĭ tui hăng tơlơi kluh amoaih soh sat gơñu pô kiăng yơh.
(2) Pơtao Solomôn čih tui anŭn yuakơ ñu ƀuh hiư̆m tơlơi bơni hiam Yahweh Ơi Adai hơmâo pha brơi laih kơ ñu, jing pô lŏm kơ Ơi Adai. Ñu hơduah ƀuh mưn tŭ tơlơi hiam klă mơ̆ng Ơi Adai pha brơi laih anŭn ăt ƀuh mơ̆n hiư̆m bưng thut ƀing mơnuih sat ƀai răm rai hĭ ƀơi hrơi hơnăl tuč gơñu. Yahweh Ơi Adai jing Pô rơgoh hiam laih anŭn ƀu hơmâo tơlơi soh sat hơget ôh amăng Ñu. Hloh kơ anŭn dơ̆ng, Ñu pơrơmut biă mă kơ tơlơi soh tơl pơkra lui dơnao apui kiăng pơrai hĭ tơlơi soh sat wơ̆t hăng ƀing ngă soh ƀu thâo kơhma̱l hĭ ôh. Samơ̆ Ñu mơak hơmư̆ hăng laĭ glaĭ hơdôm tơlơi kwưh rơkâo iâu laĭ ƀing mơnuih tơpă hơnơ̆ng. Ơi Adai ngă amơ̱ng ƀu či laĭ glaĭ ôh tơlơi kwưh rơkâo mơnuih sat ƀai yuakơ Ñu jing phŭn kơ tơlơi hiam klă rơgoh hiam, laih anŭn amăng Ñu ƀu hơmâo tơlơi grĭ grañ jŭ̱ sat ôh.
(3) Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Khua Yang hơi, brơi kơ ƀing ta thâo jing hĭ mơnuih tơpă hơnơ̆ng mơ̆ng tơlơi tŭ mă tŭ ju̱m Yang Krist nanao bĕ amăng tơlơi hơdip ta. Anai ƀu djơ̆ tơlơi ƀing ta tŭ tơlơi iâu laĭ kiăng jing mơnuih đaŏ ôh, samơ̆ kiăng laĭ kơ tơlơi đuaĭ tui dŏ kle̱p pơgop pơlir hăng Khua Yang nanao amăng tơlơi hơdip ta. Brơi hơdơr bĕ, mơnuih sat ƀai Ơi Adai ƀu či hơmư̆ hăng laĭ glaĭ tơlơi ñu rơkâo ôh. Hơnŭn yơh, brơi kơ ƀing ta thâo dŏ amăng Khua Yang nanao bĕ. Bơni hiam.