Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget Ơi Adai či phak pơkra ƀing ană tơčô kơ tơlơi soh ƀing ơi don ƀing gơ̆ truh pơ rơnŭk tal klâo tal pă̱̱ lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ jơlan Hơdrôm Hră Yap 14:18 tui hăng gah yŭ anai.
(1) Ding kơna Môseh čih pơtô yom biă mă tui anai, “Yahweh akaih hil, thâo khăp laih anŭn pap brơi kơ tơlơi soh hlơi pô pơkơdơ̆ng glaĭ hăng Ñu. Samơ̆ Ñu ƀu či lui hĭ tơlơi soh ƀu tŭ tơlơi pơkơhma̱l ôh; Ñu či phak pơkra ƀing ană tơčô kơ tơlơi soh ƀing ơi adon ƀing gơ̆ truh pơ rơnŭk tal klâo tal pă̱ yơh,” kiăng laĭ, Yahweh jing Pô ƀu či hil tañ ôh, ƀu či ječ ameč kiăng kơ phat kơđi mơnuih ôh, samơ̆ Ñu thâo khăp kơ mơnuih soh tơl Ñu pơkiaŏ trŭn Ană Ñu rai ƀơi lŏn tơnah anai kiăng song mă ƀing gơ̆ mơ̆ng tơlơi soh sat ƀing gơ̆. Hloh kơ anŭn dơ̆ng, Môseh pơruai kơ tơlơi Yahweh Ơi Adai či pap brơi tơlơi soh ƀing hlơi pô hlâo adih pơkơdơ̆ng glaĭ hăng Ñu samơ̆ ră anai tŭ đaŏ wơ̆t glaĭ pơ Ñu.
(2) Ding kơna Môseh pơtô tui anŭn yuakơ Yahweh Ơi Adai jing Pô Rơgoh Hiam samơ̆ thâo khăp pap mơ̆n, tui anŭn Ñu dưi pap brơi tơlơi soh hăng ƀu či lui brơi tơlơi soh ƀu či tŭ tơlơi phak pơkra ôh. Samơ̆ anai yơh jing tơlơi mơnuih mơnam ta khŏm hơdơr: Tơdah sa čô ngă soh pơkơdơ̆ng glaĭ hăng Khua Yang Ơi Adai, sĭt boh răm mơ̆ng tơlơi soh anŭn ăt dŏ truh pơ rơnŭk tal klâo tal pă̱, kiăng laĭ, truh pơ rơnŭk tơčĕ tơhrĕ ñu yơh. Tơlơi soh mơ̆ng ƀing ơi adon ñu ăt či dŏ truh pơ rơnŭk ñu laih anŭn mơ̆ng rơnŭk ñu dơ̆ng hlŏng truh pơ rơnŭk rơhrĕ ñu yơh. Tui anŭn, kiăng kơ pơđŭt hĭ boh răm tơlơi soh pơtưp truh pơ rơnŭk tal pă̱ anŭn, ñu anŭn khŏm wơ̆t glaĭ đaŏ kơnang đuaĭ tui kơkuh pơpŭ kơ Khua Yang Ơi Adai mơ̆ng ră anai yơh.
(3) Jing ƀing đaŏ kơnang kơ Khua Yang Yêsu, ƀing ta jing ană bă Ơi Adai laih, jing ană plơi kơ tơlơi bơngač laih, brơi kơ ƀing ta thâo boh răm tơbiă mơ̆ng tơlơi soh jing tơlơi djai. Anŭn jing tơlơi djai gah bơngăt laih anŭn tơdơi ƀiă ăt či djai hĭ gah kơđeh asar mơ̆n. Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Khua Yang hơi, brơi kơ ƀing ta thâo đaŏ kơnang kơ Ơi Adai hăng kơhma̱l hĭ bĕ abih bang tơlơi soh grĭ grañ jŭ̱ sat amăng ƀing ta, kiăng kơ Ơi Adai dưi mă pơđuaĭ hĭ čuăk tơlơi dưi tơlơi soh hăng tơlơi djai anŭn mơ̆ng ƀing ta, ană bă ta, ană tơčô ta laih anŭn tơčĕ tơhrĕ ta mơ̆n. Hơnŭn yơh, brơi kơ ƀing ta thâo wơ̆t glaĭ pơgop pơlir hăng Ơi Adai Ama ta nanao bĕ. Bơni hiam.