Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget ƀing ta năng hơduah sem iâu kwưh kơ Khua Yang lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Rơkâo kơ ƀing ta hrăm hrŏm ƀơi Yesayah 55:6 tui hăng gah yŭ anai.
(1) Pô pơala Yesayah čih pơruai glaĭ yom biă mă hơdôm tơlơi Yahweh Ơi Adai ƀuăn či pơklaih hĭ ƀing hlơi pô hơduah sem Ñu tui anai, “Tañ hơduah sem bĕ Yahweh tơdang ƀing gih dưi hơduah ƀuh Ñu. Iâu kwưh kơ Ñu bĕ tơdang Ñu dŏ jĕ,” kiăng laĭ, pô pơala čih pơtă kơ ƀing hlơi pô đŏk djơ̆ ƀơi jơlan Hơdrôm Hră anai brơi kơđiăng bĕ kơ tơlơi “mơyŭn hiam” Ơi Adai hlak pha brơi kơ ƀing mơnuih mơnam ta hlak dŏ amăng tơlơi kơnăm mơmŏt tơlơi soh, anŭn jing hơduah sem Ñu hăng iâu kwưh kơ Ñu bĕ. Anai jing jing ƀơi mông hlơi pô đŏk ƀơi jơlan phŭn anai ƀơi mông anai mơ̆n, yuakơ Boh Hiăp Ơi Adai pơhiăp tơbiă, sĭt Boh Hiăp Ñu ƀu či wơ̆t glaĭ pơ Ñu đôč đač ôh, le̱ng kơ hơmâo tơlơi kơñăm tŭ yua nanao.
(2) Pô pơala Yesayah pơtă tui anŭn yuakơ Yahweh Ơi Adai nanao pha brơi mông mơyŭn kơ mơnuih mơnam ta thâo hơduah sem hăng kwưh rơkâo iâu đĭ kơ Ñu kơ tơlơi pơklaih. Khua Yang Ơi Adai ƀu pơgŏ̱ hlơi pô ôh kiăng kơ đaŏ kơnang tŭ ju̱m Ñu, samơ̆ Ñu pơkra hơdră jơlan ƀôdah hrơi mông mơyŭn kiăng kơ mơnuih mơnam ta thâo hluh hăng đaŏ kơnang kơ Ñu. Ñu pơrơđah tơlơi Ñu kiăng mơ̆ng Boh Hiăp Ñu kiăng kơ mơnuih mơnam ta dưi đŏk kơñăm hrăm kơsem anŭn kăh Ñu či pŏk brơi yơh tơlơi thâo hluh hăng thâo krăn Ñu dơlăm lu tui. Yang Yêsu ăt pơtrŭt kơ rĭm čô mơ̆n: Hơduah sem bĕ laih anŭn či ƀuh. Tơdang ƀuh laih, Ñu ăt kiăng kơ mơnuih mơnam ta iâu kwưh kơ Ñu mơ̆n, yuakơ Ñu kiăng kơ ƀing mơnuih ta thâo pơjing tơlơi pơgop pơlir hăng Ñu. Tơdang dŏ amăng tơlơi pơgop pơlir hiam klă anŭn yơh, mơnuih mơnam ta dưi hơduah ƀuh hơdôm tơlơi hơduah sem amăng tơlơi Ñu kiăng.
(3) Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Khua Yang hơi, brơi kơ ƀing ta thâo hơduah sem ƀô̆ mơta Khua Yang nanao bĕ. Brơi kơ ƀing ta thâo kwưh rơkâo iâu laĭ Ñu nanao bĕ kiăng kơ ƀing ta dưi thâo krăn tơlơi Ñu kiăng amăng tơlơi hơdip ta. Laih anŭn brơi kơ ƀing ta thâo iâu kwưh nanao bĕ amăng anăn Khua Yang Yêsu Krist ta, yuakơ mơ̆ng Ñu yơh Ơi Adai Ama ta či hơmư̆ hăng laĭ glaĭ hơdôm tơlơi ƀing ta iâu laĭ puaĭ mơbrui hăng Ñu. Hơnŭn yơh, brơi kơ ƀing ta thâo hơduah sem hăng kwưh iâu kơ Ñu nanao bĕ amăng abih tơlơi hơdip ta. Bơni hiam.