Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget ƀing đăo ta khŏm jing hĭ nanao mơnuih tơpă hơnơ̆ng ƀơi anăp Ơi Adai lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ Yakơ 5:16 tui hăng gah yŭ anai.
(1) Ding kơna Yakơ čih pơtô yom biă mă tơdang ñu laĭ, “Tơlơi iâu laĭ mơnuih tơpă hơnơ̆ng jing hơmâo tơlơi dưi mơyang biă mă yơh,” kiăng laĭ, mơnuih tơpă hơnơ̆ng anai ƀu djơ̆ hơmâo mă ñu pô ôh, kŏn tơbiă rai mơ̆ng mơnuih pơkŏn lơi, samơ̆ mơ̆ng tơlơi khăp pap Ơi Adai yơh mơnuih dưi tŭ yap jing mơnuih tơpă hơnơ̆ng. Sa čô mơnuih đaŏ dŏ amăng tơlơi soh sat, ñu anŭn pơjŏh hĭ laih tơlơi pơgop pơlir ñu pô hăng Ơi Adai laih anŭn tơlơi tơpă hơnơ̆ng mơ̆ng ñu Ơi Adai či djă̱ pơkơ̆ng hĭ yơh tơl ñu thâo wơ̆t glaĭ pơ Ơi Adai dơ̆ng.
(2) Tơdang ƀing đaŏ pơgop pơjơnum hăng tơdruă, ƀing gơñu khŏm pơhaih tơlơi soh hăng tơdruă yơh, yuakơ Ơi Adai kiăng kơ ƀing đaŏ gơ̆ng jơlan kơ tơlơi kơhma̱l sĭt anŭn. Tơdơi anŭn, ƀing đăo soh anŭn Ơi Adai či pap brơi yơh tơdang ƀing gơñu iâu laĭ kơ tơdruă. Tơlơi pơhla̱o pơsuaih Ơi Adai či brơi kơ gah bơngăt wơ̆t hăng gah drơi jan mơ̆n tơdah hơmâo tơlơi ruă nuă. Tơdang ñu anŭn thâo kơhma̱l tơlơi soh hăng iâu laĭ kơ Ơi Adai, sĭt Ơi Adai či hơmâo hăng laĭ glaĭ hơdôm tơlơi ñu rơkâo yơh. Yuakơ anŭn yơh, mơnuih tơpă hơnơ̆ng iâu laĭ Ơi Adai, sĭt Ơi Adai či laĭ glaĭ hăng pha brơi tơlơi mơsêh mơyang dưi pơsuaih hĭ mơnuih ruă duăm yơh.
(3) Jing ƀing đaŏ kơnang kơ Khua Yang Yêsu Krist, brơi kơ ƀing ta thâo yap kơnăl bĕ kơ tơdruă hăng thâo pơhaih tơlơi soh ta pô hăng tơdruă, kiăng kơ Ơi Adai ƀuh tơlơi pơgop pơlir amăng Ñu hăng pap brơi tơlơi soh sat ta laih anŭn pơsuaih hĭ ƀing ta mơ̆ng tơlơi ruă nuă amăng drơi jan ta. Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Khua Yang hơi, brơi kơ ƀing ta thâo iâu laĭ kơ tơdruă nanao bĕ kiăng kơ ƀing ta dưi suaih hĭ. Hơnŭn yơh, brơi kơ ƀing ta thâo jing hĭ mơnuih tơpă hơnơ̆ng nanao bĕ ƀơi anăp Ơi Adai Khua Yang ta. Bơni hiam.