Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget ƀing ta anăm kla glaĭ tơlơi sat ƀai pơala kơ tơlơi hiam klă ôh lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ Pơrơtưh 17:13 tui hăng gah yŭ anai.
(1) Pơtao Solomôn čih pơtô yom biă mă tơdang ñu laĭ, “Tơdah sa čô kla glaĭ tơlơi sat ƀai pơala kơ tơlơi hiam klă, sĭt sang anŏ ñu či mă tŭ tơlơi sat ƀai nanao yơh,” kiăng laĭ, tơlơi sat ƀai jing tơlơi pơrăm sat kơ arăng, rŭ̱ nua ƀơi ƀing arăng laih anŭn ngă glaĭ kơ arăng hơget tơlơi sat arăng ngă kơ ƀing ta yơh. Tơdang hơmâo tơlơi pơglaĭ kar hăng anŭn pơala kơ tơlơi ngă hiam, sĭt tơlơi sat ƀai prŏng đĭ tui nanao yơh amăng tơlơi hơdip abih dua bơnăh anŭn. Amăng tơlơi sat ƀai anŭn jing tơlơi pơhiăp sat kơ arăng, tơlơi pơhiăp pơčeh ƀlŏr kơ arăng, tơlơi pơglưh hĭ kơnuih hiam klă arăng, tơlơi pơhiăp djik mưč kơ arăng ƀu hơmâo tơhơnăl laih anŭn tơlơi phŏng kơđi ƀôdah klă̱ kơđi kơ arăng ƀu hơmâo tơhơnăl yơh.
(2) Pơtao Solomôn mưn ƀuh laih kơ tơlơi bruă anŭn kar hăng tơdang ayŏng ñu Adoniyah rơkâo kiăng kơ pơdŏ hăng bơnai hle̱ ama ñu Dawid tơdơi kơ ama ñu djai laih, tơlơi bruă anŭn jing kiăng pơrai hĭ pơtao Solomôn yơh. Hơnăl tuč, Adoniyah khŏm tŭ tơlơi djai mơ̆ng pơtao Solomôn yơh yuakơ ñu rơkâo rơgao hơnơ̆ng đơi. Hơdrôm Hră pơtô kơ ƀing ta brơi kơ ƀing ta pơglaĭ tơlơi hiam klă kơ arăng pơala kơ tơlơi sat ƀai, yuakơ tơlơi ngă bruă hiam klă jing pơrơđah kơ tơlơi khăp kơ ƀing hlơi pô ngă sat kơ ñu yơh. Laih anŭn tơlơi khăp jing tơlơi dưi go̱m hĭ lu mơta tơlơi soh sat yơh. Tơdang sa čô mơnuih đaŏ ngă tơlơi hiam klă kơ ƀing ayăt ñu, sĭt ñu anŭn hlak pơđŭt hĭ tơlơi sat ƀai hlak čeh lar amăng tơlơi hơdip ñu, ƀing ană ñu laih anŭn ƀing tơčô tơčĕ ñu yơh.
(3) Jing ƀing đaŏ kơnang kơ Yang Yêsu, brơi kơ ƀing ta anăm kla glaĭ tơlơi sat ƀai pơala kơ tơlơi hiam klă ôh, yuakơ tơlơi bruă ngă kar hăng anŭn či mă tŭ tơlơi sat ƀai anŭn nanao yơh. Tui anŭn, Ơ ƀing met anŏng ayŏng adơi ơi yă ană amôn khăp hơeng hơi, brơi kơ ƀing ta thâo pơglaĭ tơlơi hiam klă nanao bĕ kơ tơlơi sat ƀai, yuakơ Khua Yang hơmâo pơtă laih kơ ƀing ta khŏm khăp kơ ƀing rŏh ayăt ta, iâu laĭ kơ ƀing kơpĭ kơpe̱t ta laih anŭn bơni hiam kơ ƀing ngă sat kơ ƀing ta. Tơdang ƀing ta ngă tơlơi hiam klă kar hăng anŭn, ƀing ta či tŭ mă gơnam bơni prŏng biă mă yơh amăng adai adih. Hơnŭn yơh, brơi kơ ƀing ta thâo ngă tơlơi bruă hiam klă nanao bĕ. Bơni hiam.