Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget hlơi pô ngă sat ƀai ñu anŭn pơrơmut kơ Pô jing kar hăng tơlơi bơngač laih anŭn ƀu či nao pơ Ñu ôh lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hoeng amăng Yang Krist. Anai jing tơlơi laĭ glaĭ kơ Yôhan 3:20 tui hăng gah yŭ anai.
(1) Ding kơna pơjao Yôhan čih pơruai yom biă mă tơdang ñu ruai glaĭ tơlơi Yang Yêsu pơhiăp pơtô kơ Nikodemos tui anai, “Hlơi pô ngă sat ƀai ñu anŭn pơrơmut kơ Pô jing kar hăng tơlơi bơngăt, laih anŭn ƀu či nao pơ Ñu ôh, yuakơ ñu huĭ kơ Pô anŭn pơrơđah hĭ tơlơi bruă sat ƀai ñu hơmâo ngă laih,” kiăng laĭ, Pô jing kar hăng tơlơi bơngač anŭn jing Yang Yêsu pô yơh. Yôhan pơruai tơlơi Yang Yêsu pơblang kơ Nikodêmos kơ tơlơi tokeng dơng kơ phrâo amăng tơlơi hơdip gah mơyang. Kiăng kơ tŭ tơkeng rai gah mơyang sĭt yơh pô anŭn khŏm tŭ ju̱m Yang Krist jing Khua Yang hăng Pô Pơklaih amăng tơlơi hơdip ñu pô yơh. Ñu anŭn khŏm tŭ ju̱m hăng đaŏ kơnang kơ bruă Yang Yêsu djai ƀơi kơyâo bơrơkal kiăng kơ mă pơđuaĭ hĭ khul tơlơi soh sat ñu yơh.
(2) Tơdah pô anŭn ƀu tŭ ju̱m Khua Yang ôh samơ̆ ngă tơlơi bruă sat ƀai, sĭt ñu anŭn jing pô pơrơmut hĭ Khua Yang Yêsu yơh. Yang Yêsu rai kiăng kơ pơklaih hĭ ñu, samơ̆ ñu hơngah hĭ tơlơi pơklaih anŭn yuakơ ñu khăp kơ bruă sat ƀai hăng dŏ amăng tơlơi kơnăm mơmŏt lu hloh yơh. Tơdah mơnuih mơnam tŭ ju̱m Khua Yang, ñu anŭn khŏm pơrơđah hĭ abih bang bruă sat ƀai hăng hơngah lui hĭ, kiăng laĭ, kơhma̱l hĭ yơh tơlơi soh sat anŭn. Tơdah ñu ăt dŏ ngă sat ƀai đôč, sĭt ñu anŭn ƀu djơ̆ kơnơ̆ng hơngah hĭ Ơi Adai ôh, samơ̆ ăt hơngah hĭ tơlơi hơdip hlŏng lar sa hrơi tơdơi mơ̆n, yuakơ ñu anŭn ăt dŏ khăp kơ tơlơi kơnăm mơmŏt.
(3) Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Khua Yang hơi, brơi kơ ƀing ta thâo tŭ ju̱m hăng đaŏ kơnang kơ Khua Yang Yêsu Krist bĕ, kiăng kơ jing ƀing khăp kơ Pô jing kar hăng tơlơi bơngač anŭn. Brơi kơ ƀing ta thâo nao ƀơi anăp Ơi Adai nanao bĕ, kiăng kơ tơlơi sot sat kơnăm mơmŏt đuaĭ ataih hĭ mơ̆ng tơlơi hơdip jua pơmĭn ta. Hơnŭn yơh, brơi kơ ƀing ta thâo khĭn nao pơ Khua Yang Yêsu nanao tơl abih tơlơi hơdip ta. Bơni hiam.