Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget pô ring jia ƀu khĭn angak đĭ ƀô̆ mơta pơ adai laih anŭn tŭk tơda rơngot hơning rơkâo pap mơñai mơ̆ng Ơi Adai lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Yang Krist. Anai jing tơlơi laĭ glaĭ kơ Luk 18:13 tui hăng gah yŭ anai.
(1) Ding kơna Luk čih pơruai glaĭ yom biă mă tơdang ñu ruai tui anai, “Samơ̆ pô ring jia dŏ dơ̆ng ataih ƀiă mơ̆ng mơnuih pơkŏn, ƀu khĭn angak đĭ ƀô̆ mơta pơ adai ôh. Ñu tŭk ƀơi tơda ñu hăng laĭ tui anai” Ơ Ơi Adai ăh, rơkâo Ih pap brơi kơ kâo đa, yuakơ kâo jing mơnuih soh sat,” kiăng laĭ, pô ring jia anai thâo krăn ñu pô jing mơnuih soh sat. Tui anŭn, ñu luă gŭ ñu pô ƀơi anăp Ơi Adai hăng yap kơ ñu pô jing mơnuih soh sat biă mă laih anŭn tŭ ư hăng Ơi Adai kơ tơlơi Ơi Adai jing Pô tơpă hơnơ̆ng hloh, djơ̆ hloh. Hơdrôm Hră ăt laĭ mơ̆n, mơyŭn mơak yơh kơ hlơi pô thâo hơmâo pran jua rơngot honing, kiăng laĭ, thâo kơhma̱l tơlơi soh hăng luă gŭ pô, ñu anŭn či tŭ tơlơi pơjuh pơalum mơ̆ng Khua Yang yơh, yuakơ ñu tŭ Ơi Adai pap brơi tơlơi soh hăng yap ñu jing tơpă hơnơ̆ng.
(2) Tơdang pô ring jia anŭn ƀu khĭn angak đĭ ôh ƀô̆ mơta ñu pơ adai, yuakơ ñu mlâo kơ tơlơi soh sat ñu hơmâo ngă laih. Ñu pô thâo krăn kơ tơlơi soh sat anŭn hăng hơngah lui hĭ kiăng kơ tŭ tơlơi Ơi Adai pap brơi. Ñu pô ăt kŏn yap lơi ñu jing hiam klă kar hăng mơnuih pơkŏn tơl ñu dŏ ataih ƀiă mơ̆ng mơnuih pơkŏn. Sĭt pran jua tơlơi pơmĭn luă gŭ ba rai kơ mơnuih thâo pơtrŭn ñu pô biă mă yơh. Hloh kơ anŭn dơ̆ng, ñu thâo krăn kơnơ̆ng hơjăn Ơi Adai đôč yơh dưi pap brơi tơlơi soh ñu hăng pơrơgoh hĭ ñu mơ̆ng abih bang tơlơi wĕ wŏ. Yukơ anŭn yơh, ñu khĭn yap kơnăl kơ tơlơi Ơi Adai jing Pô tŏng ten pap brơi abih bang tơlơi soh sat grĭ grañ ñu yơh.
(3) Bơ kơ ƀing ta jing ƀing ană bă Ơi Adai, brơi kơ ƀing ta thâo luă gŭ rơkâo pơhaih nanao bĕ abih bang tơlơi soh sat ta ƀơi anăp Ơi Adai, yuakơ Ñu či pap brơi hăng lŏm hĭ abih bang tơlơi wĕ wŏ ta anŭn. Brơi kơ ƀing ta thâo mlâo bĕ kơ tơlơi soh sat ta, anăm pơgao pơang ôh kơ tơlơi ƀu hiam klă ta. Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Khua Yang hơi, brơi kơ ƀing ta thâo luă gŭ tŭk tơda ta pô yuakơ khul tơlơi ƀu pơmơak ta ƀơi anăp Ơi Adai bĕ, yuakơ Ñu jing Pô tŏng ten hăng tơpă hơnơ̆ng či pap brơi abih bang. Hơnŭn yơh, brơi kơ ƀing ta thâo luă gŭ ƀơi anăp Khua Yang Ơi Adai nanao bĕ. Bơni hiam.