Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
hium pa jolan anai kiang po hrām broi ana ba le?
TƠÑA: Yua hơget mơnuih sat ƀai lê̆ djơ̆ hĭ amăng čơđo̱ng tơlơi hơhiăp soh ñu pô, samơ̆ mơnuih tơpă hơnơ̆ng klaih hĭ mơ̆ng tơlơi rŭng răng lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ Pơrơtưh 12:13 tui hăng gah yŭ anai.
(1) Pơtao Solomôn čih pơtô yom biă mă tơdang ñu laĭ, “Mơnuih sat ƀai lê̆ djơ̆ hĭ amăng čơđo̱ng tơlơi pơhiăp soh ñu pô, samơ̆ mơnuih tơpă hơnơ̆ng klaih hĭ mơ̆ng tơlơi rŭng răng yơh,” kiăng laĭ, sa čô mơnuih ƀu thâo răng ôh kơ tơlơi ñu pơhiăp, sĭt yơh ăt mơ̆ng tơlơi pơhiăp ñu pô mơ̆n či pơruă hĭ ñu pô yơh tơdơi anai. Mơnuih sat ƀai jing ƀing mơnuih kơnơ̆ng thâo pơmĭn amăng jua pơmĭn ñu pô bă hăng tơlơi sat ƀai khăp ngă sat pơmĭn sat laih anŭn nanao kơñăm kơ tơlơi ngă sat yơh. Ñu anŭn ƀu či pơmĭn hăng ƀu thâo krăn ôh hơdôm tơlơi ñu pơhiăp anŭn či wơ̆t glaĭ ƀơi akŏ ñu pô, samơ̆ ñu nanao kơñăm pơmĭn kiăng kơ ngă sat kơ ƀing arăng yơh.
(2) Pơtao Solomôn ăt pơtô mơ̆n kơ tơlơi ƀing mơnuih tơpă hơnơ̆ng či klaih hĭ mơ̆ng tơlơi rŭng răng, yuakơ mơnuih tơpă hơnơ̆ng yua mơ̆ng tơlơi tơpă hơnơ̆ng Ơi Adai dŏ hrŏm hăng ñu, sĭt ñu pô či klaih hĭ mơ̆ng lu mơta tơlơi ƀing arăng pơhiăp sat djik djak kơhak kơčuh kơ ñu yơh, yuakơ Khua Yang Ơi Adai jing Pô răng pơgang brơi kơ ñu nanao. Mơnuih tơpă hơnơ̆ng ƀơi anăp ñu hơmâo nanao tơlơi pơmĭn hiam klă, khăp ngă tơlơi klă djrưng laih anŭn nanao pơmĭn kơñăm kơ tơlơi bơni hiam kơ ƀing arăng. Wơ̆t tơdah ƀing arăng ngă rŏh ayăt hăng ñu hăng pơhiăp sat ƀai kơ ñu kơtang kơtĭt, samơ̆ ñu pô ƀu či rŭng răng ôh, yuakơ Khua Yang Ơi Adai jing anih ñu dŏ kơđap laih anŭn boh pơtâo kơ ñu kiăng kơ đuaĭ kơdŏp. Hră Ơi Adai ăt laĭ mơ̆n, pơglaĭ bĕ tơlơi hiam kơ tơlơi sat ƀai. Sĭt mơnuih tơpă hơnơ̆ng nanao ngă hiam kơ ƀing arăng wơ̆t tơdah ƀing arăng ngă rŏh ayăt hăng ñu.
(3) Jing ƀing ană bă Ơi Adai, brơi kơ ƀing ta hrăm tui pơtao Solomôn pơtô anai jing yom biă mă yơh. Brơi kơ ƀing ta thâo jing mơnuih tơpă hơnơ̆ng amăng Khua Yang nanao bĕ, yuakơ kơnơ̆ng hơjăn mơnuih tơpă hơnơ̆ng đôč yơh dưi ngă tơlơi bruă tơpă hơnơ̆ng hiam klă kơ ƀing arăng. Tui anŭn, Ơ ƀing met anŏng ayŏng adơi ơi yă ană amôn khăp hơeng hơi, brơi kơ ƀing ta thâo đaŏ kơnang nanao bĕ kơ Khua Yang Yêsu, yuakơ anŭn jing tơlơi tơpă hơnơ̆ng ta. Brơi kơ ƀing ta thâo răng nanao bĕ ƀơi bah jơlah ƀing ta pơhiăp tơbiă, yuakơ yua mơ̆ng tơlơi pơhiăp anŭn mơ̆n, Ơi Adai či phat kơđi kơ ƀing ta. Hơnŭn yơh, brơi kơ ƀing ta tañ hơmư̆ nanao bĕ, samơ̆ brơi kơ ƀing ta thâo akaih pơhiăp hăng sui hil, yukơ tơlơi hil nač ta ƀu či pơjing rai tơlơi tơpă hơnơ̆ng Ơi Adai ôh. Bơni hiam.