Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget ƀing ta khŏm mă bruă hur har nanao kơ Khua Yang ta lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ 1 Korinthos 15:58 tui hăng gah yŭ anai.
(1) Ding kơna pơjao Paul čih pơtô yom biă mă tơdang ñu pơtrŭt tui anai, “Hơnŭn yơh, Ơ ƀing ayŏng amai adơi kâo khăp hơi, ƀing gih dŏ kơjăp bĕ. Anăm ƀing gih pơpư̆ pơgơi ôh. Mă bruă hur har nanao bĕ kơ Khua Yang, yuakơ ƀing gih thâo krăn yơh kơ tơlơi bruă mơnuă gih amăng Khua Yang ƀu či jing hĭ đôč đač ôh,” kiăng laĭ, hlâo kơ Paul pơtrŭt kơ tơlơi kiăng kơ mă bruă hur har amăng Khua Yang, ñu pơpŭ pơyom iâu yap kơ ƀing đaŏ kơ Yang Yêsu Krist jing ƀing ayŏng amai adơi ñu khăp amăng Khua Yang. Ñu pơtrŭt kơ ƀing gơ̆ kiăng kơ dŏ kơjăp amăng Khua Yang yuakơ tơdah ƀu dŏ kơjăp ôh, sĭt amuñ biă mă či tŭ tơhrŏh đuaĭ hĭ mơ̆ng tơlơi đaŏ kơnang anŭn yơh. Kiăng kơ dŏ kơjăp amăng Khua Yang, ñu pơtrŭt kơ ƀing đaŏ brơi thâo ngă tui tơlơi Khua Yang kiăng, anŭn jing hơmư̆ tơlơi Khua Yang pơđar hăng ngă tui yơh. Ñu thâo krăn tơdah ƀing đaŏ ƀu kiăng hơmư̆ ôh Boh Hiăp Ơi Adai hăng ngă tui ôh, sĭt ñu anŭn ƀu dŏ kơjăp nanao ôh, samơ̆ či pơpư̆ pơgơi kơtang hăng lui wir hĭ tơlơi đaŏ yơh.
(2) Ding kơna pơjao Paul čih tui anŭn yuakơ ñu kiăng pơhiăp kơđŏm kơ abih bang ƀing mă bruă kơ Khua Yang Ơi Adai tui anai, tơlơi bruă ƀing ayŏng amai adơi mă bruă hur har amăng Khua Yang jing tơlơi bruă ƀu djơ̆ jing hĭ đôč đač ôh, samơ̆ jing tơlơi bruă yom biă mă ƀơi anăp Ơi Adai, yuakơ tơlơi bruă anŭn jing ma̱n pơdơ̆ng đĭ kar hăng gơnam mah amrăk yom yơh. Tơdah sa čô mơnuih đaŏ ƀôdah sa čô mơnuih mă bruă kơ Ơi Adai ƀu hơmâo pran jua kơjăp hơđơ̆ng ôh, sĭt ñu anŭn amuñ biă mă kiăng kơ lui bruă hăng đuaĭ nao pơ bruă tơlơi đaŏ pơkŏn ƀôdah ƀu thâo gir run mă bruă kơ Ơi Adai dơ̆ng tah. Kiăng kơ thâo mă bruă hur har amăng Khua Yang nanao, brơi bĕ pran jua tơlơi pơmĭn ñu dŏ kơjăp ƀơi Boh Hiăp Ơi Adai amăng Khua Yang ƀu pơpư̆ pơgơi ôh.
(3) Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Khua Yang hơi, brơi kơ ƀing ta thâo pơmĭn bĕ kơ tơlơi bruă Khua Yang Ơi Adai hlak iâu ƀing ta dŏ ngă bruă kơ Ñu ră anai. Brơi kơ ƀing ta thâo hur har mă bruă anăm rŭng răng pơpư̆ pơgơi yuakơ hơmâo lu mơnuih pơhiăp djik djak kơhak kơčuh laih anŭn pơhiăp rơkŭt sat kơ ƀing ta ôh. Samơ̆ brơi kơ ƀing ta thâo dŏ kơjăp nanao ƀơi Boh Hiăp Yang Yêsu pơtô: ngă hiam klă hăng bơni hiam nanao kơ ƀing hlơi pô pơhiăp sat hăng ngă ƀai kơ ƀing ta, yuakơ ƀing ta thâo krăn kơ tơlơi Ơi Adai nanao khăp kơ ƀing ta hăng bơni hiam kơ ƀing ta nanao. Hơnŭn yơh, brơi kơ ƀing ta thâo mă bruă hur har kơ Khua Yang hăng jua pơmĭn kơjăp nanao bĕ, yuakơ tơlơi bruă anŭn Khua Yang hơmâo yap pioh laih. Bơni hiam.