308. AKŎ: Hơmâo Bĕ Jua Pơmĭn Jơngeh Rơgoh

308. AKŎ: Hơmâo Bĕ Jua Pơmĭn Jơngeh Rơgoh

Posted on Posted in Uncategorized

 Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 308. AKŎ: Hơmâo Bĕ Jua Pơmĭn Jơngeh RơgohTƠÑA: Yua hơget ƀing đaŏ khŏm hơmâo jun pơmĭn jơngeh rơgoh ƀơi anăp Khua Yang Ơi Adai lĕ?

LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi glaĭ kơ Titos 1:15 tui hăng gah yŭ anai.

(1) Ding kơna pơjao Paul čih pơtô yom biă mă tơdang ñu laĭ tui anai, “Kơ ƀing hơmâo jua pơmĭn jơngeh rơgoh, abih bang tơlơi jing jơngeh rơgoh yơh, samơ̆ kơ ƀing hlơi pô hơmâo jua pơmĭn soh sat laih anŭn ƀu đaŏ kơnang ôh, sĭt ƀu jing hĭ jơngeh rơgoh ôh. Sĭt yơh, abih dua tơlơi pơmĭn gơñu wơ̆t hăng pran jua tơpă gơñu jing hĭ grĭ grañ soh sat yơh,” kiăng laĭ, Paul pơtrŭt kơ ƀing hơmâo jua pơmĭn jơngeh rơgoh jing ƀing đaŏ kơnang kơ Khua Yang Yêsu sĭt kiăng kơ thâo dŏ kle̱p pơgop pơlir amăng Khua Yang nanao hăng tơlơi bruă hơdip hơdơ̆ng thâo krăn Ơi Adai hăng ngă tui tơlơi Khua Yang kiăng yơh. Hlơi pô hơmâo jua pơmĭn jơngeh rơgoh sĭt ƀing gơñu či hơmâo abih bang tơlơi jơngeh rơgoh yơh amăng bruă mơnuă ƀing gơñu ngă, yuakơ tơbiă rai mơ̆ng jua pơmĭn gơñu jing tơlơi ngă brơi kơ pran jua gơñu ăt jing jơngeh rơgoh mơ̆n. Giŏng anŭn, bruă pơrơđah amăng tơlơi hơdip hơdơ̆ng gơñu jing jơngeh rơgoh hiam yơh. Bơ kơ ƀing đaŏ ƀu hơmâo jua pơmĭn jơngeh rơgoh ôh, sĭt ƀing gơñu ăt ƀu či hơmâo tơlơi jơngeh hiam rơgoh lơi amăng tơlơi hơdip hơdơ̆ng rĭm hrơi gơñu, yuakơ ƀing gơñu ăt dŏ djă̱ pioh ngă tui hơdôm kơnuih soh sat grĭ grañ anŭn kơčrâo brơi.

(2) Ding kơna pơjao Paul čih pơtô tui anŭn, yuakơ ñu kiăng kơ ƀing đaŏ thâo krăn sĭt kơ tơlơi hơmư̆ tui hơdôm tơlơi akhan đôč đač laih anŭn hơdôm tơlơi pơhiăp pơruai ƀu sĭt ôh jing tơhơnăl tơlơi ba rai tơlơi grĭ grañ ƀu jơngeh rơgoh yơh amăng pran jua tơlơi pơmĭn mơnuih đaŏ. Kơnuih soh ƀôdah kơnuih so mơnuih đaŏ ta nanao kiăng kơ git gai wai lăng dui ba ƀing gơñu amăng tơlơi ƀu tui gưt kơ Khua Yang Ơi Adai laih anŭn pơkơdơ̆ng glaĭ hăng tơlơi sĭt Khua Yang. Yuakơ anŭn yơh ding kơna pơjao Paul pơtrŭt kơ ƀing đaŏ khŏm hơmâo jua pơmĭn jơngeh rơgoh nanao yơh kiăng kơ thâo kơnăl tơlơi ƀlŏr, tơlơi grĭ grañ, tơlơi bruă ƀu hiam klă laih anŭn tơlơi bruă ƀu thâo tui gưt kơ Ơi Adai, kiăng kơ thâo đuaĭ tơklaih hĭ mơ̆ng tơlơi dưi hăng tơlơi kơpĭ tơlơi soh laih anŭn ƀing yang sat anŭn.

(3) Jing ƀing đaŏ kơnang kơ Yang Yêsu Krist, brơi kơ ƀing ta thâo hơduah sem mă tŭ bĕ tơlơi sĭt Khua Yang kơ tơlơi hơdip ta pô nanao, yuakơ tơdah ƀing ta thâo krăn mưn tŭ tơlơi sĭt, ƀing ta či tŭ mă tơlơi pơrơngai sĭt mơ̆ng Khua Yang yơh kiăng kơ ƀing ta dưi klaih hĭ mơ̆ng tơlơi dưi sat ƀai anŭn. Hơnŭn yơh, Ơ ƀing met anŏng ayŏng adơi ơi yă ană amôn khăp hơeng amăng Khua Yang hơi, brơi kơ ƀing ta thâo pioh nanao bĕ pran jua tơlơi pơmĭn ta jing hĭ jơngeh klă rơgoh hiam amăng Khua Yang, yuakơ amăng Khua Yang yơh jing phŭn tơlơi bơni hiam kơ ƀing ta. Hơnŭn yơh, brơi kơ ƀing ta thâo hơmâo bĕ jua pơmĭn jơngeh rơgoh nanao amăng Yang Krist. Bơni hiam.

Leave a Reply

Your email address will not be published. Required fields are marked *