Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget ƀing đaŏ năng pơpŭ pơyom hloh kơ ƀing ding kơna Ơi Adai mă bruă gleh hăng pơtô pơhrăm kơ ƀing đaŏ amăng tơlơi khăp Khua Yang lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ 1 Thessalonikê 5:12-13 tui hăng gah yŭ anai.
(1) Ding kơna pơjao Paul čih pơtô yom biă mă tơdang ñu laĭ tui anai, “Ơ ƀing ayŏng amai adơi hơi, ƀing gơmơi rơkâo kơ ƀing gih kiăng kơ pơpŭ pơyom kơ ƀing hlơi pô mă bruă gleh amăng ƀing gih, jing ƀing wail ăng ƀing gih amăng Khua Yang laih anŭn pơtô pơhrăm ƀing gih. Ngă bĕ kơ ƀing gơñu hăng tơlơi pơpŭ pơyom hloh amăng tơlơi khăp yuakơ tơlơi bruă gơñu. Hơdip rơnŭk rơno̱m bĕ hăng tơdruă,” kiăng laĭ, tui hăng tơlơi juăt mơnuih mơnam, tơdah ƀing arăng mă bruă djru kơ ƀing ta, sĭt ƀing ta ăt či hơdơr tơngia djru glaĭ mơ̆n yuakơ tơlơi bruă anŭn. Jai ƀai lu hloh yơh tơdang ƀing ding kơna Ơi Adai mă bruă Ơi Adai djru kơ ƀing Sang Ơi Adai kiăng kơ thâo krăn đuaĭ tui Khua Yang amăng tơlơi đaŏ, sĭt ƀing đaŏ khŏm pơmĭn pơpŭ pơyom ƀu djơ̆ djik djak ôh, kiăng kơ pơrơđah kơ ƀing gơ̆, laih anŭn ƀing ding kơna Ơi Adai ƀu djơ̆ yuakơ arăng pơpŭ pơyom ôh tơl yap gơñu pô jing khua gah ngŏ kơ abih bang. Sĭt yơh tơlơi pơpŭ pơyom anŭn ăt nao hrŏm hăng tơlơi hơdơr tơngia djru tơlơi kơƀah kiăng kơ ƀing gơ̆ mơ̆n yuakơ ƀing ding kơna anŭn hơmâo pioh abih hrơi mông ƀing gơ̆ kơ tơlơi pơtô pơhrăm anŭn.
(2) Ding kơna pơjao Paul čih tui anŭn yuakơ ñu kiăng kơ ƀing đaŏ thâo hơdip rơhao čơmah hăng tơdruă boh nik ñu thâo hơdơr tơngia kơ ƀing mă bruă kơ Ơi Adai yuakơ anŭn jing tơlơi pơgop pơlir ƀing đaŏ năng ngă hăng tơdruă yơh. Hloh kơ anŭn dơ̆ng, tơdang ƀing đaŏ thâo pơpŭ pơyom hăng thâo hơdơr tơngia djru kơ ƀing mă bruă kơ Ơi Adai, ƀing gơñu hơmâo pơrơngai hĭ gơñu pô mơ̆ng tơlơi dưi mŭk dram yơh, kiăng laĭ, ƀing gơñu ƀu či brơi kơ mŭk dram gơñu jing khua kơ gơñu pô ôh, samơ̆ thâo yap kơnăl kơ tơlơi Khua Yang Ơi Adai yơh jing khua git gai abih bang mŭk dram ƀing gơñu hơmâo. Abih bang tơlơi bruă ngă anŭn jing pơrơđah amăng tơlơi khăp yơh jing tơlơi Ơi Adai kiăng kơ rĭm ƀing đaŏ ngă kơ tơdruă laih anŭn kơ ƀing hlơi pô mă bruă kơ Khua Yang, ăt yuakơ anŭn mơ̆n jing tơlơi thâo ngă pơgiŏng hĭ tơlơi juăt Ơi Adai yua mơ̆ng tơlơi khăp. Tơdang ƀing đaŏ thâo ngă bruă tui anŭn, ƀing đaŏ hơmâo pơrơđah laih yơh kơ tơlơi hơdip rơnŭk rơno̱m hăng tơdruă hăng thâo pơpŭ pơdun đĭ Khua Yang jing gah ngŏ kơ abih bang tơlơi bruă.
(3) Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Khua Yang, brơi kơ ƀing ta thâo krăn sĭt bĕ, tơdang ƀing ta pơpŭ pơyom kơ ƀing mă bruă kơ Khua Yang Ơi Adai, ƀing ta ăt thâo pơpŭ pơyom kơ Ơi Adai mơ̆n. Laih anŭn tơdang ƀing ta hơdơr tơngia djru brơi tơlơi kơƀah kiăng ƀing ding kơna Ơi Adai, ƀing ta ăt thâo mă bruă hrŏm hơbĭt hăng ƀing mă bruă kơ Ơi Adai yơh. Brơi kơ ƀing ta thâo hơdip rơnŭk rơno̱m nanao bĕ hăng tơdruă kiăng kơ thâo mă bruă kơ Khua Yang Ơi Adai hăng tơlơi sĭt nik. Hơnŭn yơh, brơi kơ ƀing ta thâo pơpŭ pơyom djru bĕ kơ tơdruă nanao amăng tơlơi khăp Khua Yang laih anŭn thâo hơdip rơnŭk rơno̱m hăng tơdruă nanao. Bơni hiam.