Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget rĭm čô ƀing đaŏ brơi thâo grơ̆ng glăm kơ tơlơi bruă ñu pô ngă ƀơi anăp Khua Yang lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ Galatia 6:4 tui hăng gah yŭ anai.
(1) Ding kơna pơjao Paul čih pơruai yom biă mă tơdang ñu laĭ tui anai, “Pơala kơ tơlơi anŭn, rĭm čô khŏm lông lăng hơget tơlơi ñu pô ngă. Tơdah bruă ñu jing hiam klă, sĭt ñu dưi mơak yơh kơ ñu pô hơmâo ngă laih bruă anŭn, laih anŭn ƀu pơhơmu ñu pô hăng pô pơkŏn ôh,” kiăng laĭ, kơ tơlơi bruă ngă tui hăng Tơlơi Pơthâo Hiam hơmâo pơtô laĭ laih, rĭm čô khŏm ngă tui samơ̆ ăt khŏm ep kơsem hăng lông lăng glaĭ huĭdah hơdôm tơlơi bruă anŭn jing ƀu djơ̆ tui hăng tơlơi Khua Yang pơtô ôh. Kiăng laĭ, tơdah ƀing đaŏ ngă mơta bruă đuaĭ tui hăng Yang Bơngăt Ơi Adai dui ba, sĭt anŭn jing yom pơphan biă mă yơh, samơ̆ tơdah ƀing đaŏ ngă tui hăng yang bơngăt amăng ƀing gơñu pơtrŭt pơđar samơ̆ ƀu djơ̆ mơ̆ng Khua Yang ôh, sĭt anăm ngă tui ôh. Yuakơ tơhơnăl tơlơi kar hăng anŭn yơh, rĭm čô ƀing đaŏ khŏm lông lăng ep kơsem glaĭ hơdôm bruă ñu pô hơmâo ngă laih kiăng kơ thâo bruă ñu ngă anŭn mơ̆ng Ơi Adai mơ̆n thâo. Bruă ƀing đaŏ ngă tui Yang Bơngăt Hiam dui ba jing tơlơi djru brơi kơ ƀing ayŏng amai adơi đaŏ soh thâo wơ̆t glaĭ pơ jơlan tơpă hiam Khua Yang samơ̆ ƀing gơñu khŏm thâo luă gŭ tơdu rơun yơh yơh.
(2) Ding kơna pơjao Paul čih pơtă tui anŭn yuakơ ñu kiăng kơ rĭm mơnuih đaŏ kơ Yang Yêsu Krist thâo hơmâo kơnuih tơdu rơun hăng thâo răng pô tơdang dju brơi kơ ayŏng amai adơi đaŏ ta thâo wơ̆t glaĭ pơ Khua Yang mơ̆ng jơlan ƀu hiam klă ñu. Pô đaŏ anŭn khŏm thâo gŭm djru kơ tơdruă yơh tơdang amăng hrơi mông gleh tơnap pô anŭn yuakơ ñu kiăng kơ ngă tui hăng tơlơi Yang Krist pơtô pơđar. Hloh kơ anŭn dơ̆ng, pô đaŏ anăm lăng kơ ñu pô jing yom pơphan hloh kơ ƀing arăng tơl ƀu kiăng djru ôh kơ ƀing lê̆ rơbuh amăng tơlơi soh thâo wơ̆t glaĭ pơ Khua Yang. Hơdrôm tơlơi bruă kar hăng anŭn yơh ding kơna pơjao Paul čih pơđar kơ rĭm čô đaŏ kiăng kơ thâo ngă yuakơ Tơlơi Pơthâo Hiam Yang Krist hơmâo pha brơi laih.
(3) Jing ƀing đaŏ kơnang kơ Khua Yang Yêsu, ƀing ta jing laih ƀing ană bă Ơi Adai. Brơi kơ ƀing ta thâo grơ̆ng glăm gŭm djru bĕ kơ ƀing ayŏng amai adơi đaŏ ta thâo wơ̆t glaĭ pơ Ơi Adai mơ̆ng jơlan soh sat gơñu. Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Khua Yang hơi, brơi kơ ƀing ta thâo hơmâo bĕ kơnuih kar hăng Yang Krist hơmâo amăng tơlơi tơdu rơun rŭ̱ pơdơ̆ng glaĭ mơnuih soh wơ̆t glaĭ pơ Ơi Adai. Brơi kơ ƀing ta anăm pơhơmu ta pô hăng pô pơkŏn ôh, yuakơ tơdah ƀing ta ngă kar hăng anŭn, ƀing ta či lăng ta pô jing yom pơphan hloh kơ arăng yơh laih anŭn amuñ biă mă kơ ƀing ta či lê̆ rơbuh amăng tơlơi plư yang sat. Hơnŭn yơh, brơi kơ rĭm čô ƀing ta thâo grơ̆ng glăm bĕ kơ tơlơi ñu pô ngă kiăng kơ ngă tui hăng tơlơi Khua Yang pơđar. Bơni hiam.