Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget ƀing ta khŏm nao hyu pơhaih kơ tơlơi Yang Yêsu jing Ană Đah Rơkơi Ơi Adai, jing Pô Pơklaih kơ abih bang mơnuih lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai yơh jing tơlơi laĭ glaĭ kơ 1 Yôhan 4:15 tui hăng gah yŭ anai.
(1) Ding kơna pơjao Yôhan čih pơtô yom biă mă tơdang ñu laĭ tui anai, “Tơdah hlơi pô pơhaih kơ tơlơi Yang Yêsu jing Ană Đah Rơkơi Ơi Adai, Ơi Adai dŏ kle̱p amăng ñu laih anŭn ñu dŏ kle̱p amăng Ơi Adai yơh,” kiăng laĭ, hlơi pô pơhaih tơbiă kơ tơlơi ñu pô đaŏ kơnang nanao kơ Yang Yêsu, Ană Đah Rơkơi Ơi Adai, jing Khua Yang hăng Pô Pơklaih kơ ñu pô, sĭt ñu anŭn dŏ kle̱p pơgop pơlir pơgop sa amăng tơlơi mưn tŭ hlơi Khua Yang jing amăng tơlơi hơdip ñu pô yơh. Tơlơi pơhaih tơbiă jing tơlơi ñu hơmâo đaŏ kơnang laih amăng pran jua tơlơi pơmĭn tơlơi hơdip ñu kơ Yang Krist, laih anŭn thâo krăn kơnơ̆ng hơjăn Khua Yang đôč yơh dưi pha brơi tơlơi pơgop pơlir anŭn.
(2) Ding kơna pơjao Yôhan čih pơtô tui anŭn yuakơ ñu kiăng kơ ƀing đaŏ thâo krăn đaŏ kơnang ƀơi tơlơi khăp Ơi Adai hơmâo pha brơi laih kơ ƀing đaŏ amăng Ană Ñu jing Yang Yêsu Krist. Hloh kơ anŭn dơ̆ng, Yôhan pơhiăp pơkơđŏm kơ tơlơi Ơi Adai jing tơlơi khăp laih anŭn hlơi pô dŏ kle̱p amăng tơlơi khăp Ơi Adai, ñu anŭn ăt dŏ kle̱p amăng Ơi Adai laih anŭn Ơi Adai dŏ kle̱p amăng ñu anŭn yơh. Tơlơi ƀing đaŏ thâo krăn gơñu pô dŏ kle̱p amăng Ơi Adai jing yua mơ̆ng tơlơi bruă Yang Bơngăt Hiam yơh, jing Pô dŏ hrŏm gah lăm kơ ƀing đaŏ kơ Yang Krist nanao. Dŏ kle̱p amăng Ơi Adai jing tơlơi tŭ yua prŏng prin biă mă kơ rĭm ƀing đaŏ, yuakơ hlơi pô dŏ kle̱p amăng Khua Yang, ñu anŭn ƀu či hơmâo tơlơi huĭ bra̱l amăng tơlơi hơdip ñu ôh yuakơ tơlơi rơnŭk rơnua Khua Yang dŏ bă blai amăng ñu anŭn nanao.
(3) Jing ƀing đaŏ kơnang kơ Yang Yêsu Krist, ƀing ta hơmâo laih Yang Bơngăt Hiam hơdip gah lăm ƀing ta nanao. Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Khua Yang, brơi kơ ƀing ta thâo dŏ kle̱p amăng Yahweh Ơi Adai nanao bĕ, kiăng kơ ƀing ta nanao mưn tŭ tơlơi bơni hiam Ñu bă blai amăng jua bơngăt tơlơi hơdip hơdơ̆ng ta laih anŭn thâo ngă gơ̆ng jơlan hyu pơhaih kơ tơlơi Khua Yang Yêsu Krist yơh jing Khua Yang laih anŭn Pô Pơklaih kơ lŏn tơnah. Hơnŭn yơh, brơi kơ ƀing ta thâo pơhaih nanao bĕ kơ tơlơi Yang Yêsu jing Ană Đah Rơkơi Ơi Adai kơ abih bang mơnuih. Bơni hiam.