Kơkuh hăng tơlơi tơña bla, kơ abih bang ƀing met ađŏng ayŏng amai adơi ơi yă ană amon khăp hơ-eng amăng Yang Krist! Rơkâo kơ ƀing ta pioh mông pơhrăm hrơ̆m hơbĭt bĕ ƀơi jơlan phŭn yo̱m pơphăn gah yŭ̱ anai. 
TƠÑA: Yua hơget ƀing đaŏ khŏm djă̱ pioh kơjăp Tơlơi Pơthâo Hiam Yang Krist amăng tơlơi hơdip gơñu lĕ?
LAĬ GLAĬ: Kơkuh kơ abih bang ƀing met anŏng ayŏng adơi ơi yă ană amôn khăp hơeng amăng Khua Yang. Anai jing tơlơi laĭ glaĭ kơ 1 Korinthos 15:2 tui hăng gah yŭ anai.
(1) Ding kơna pơjao Paul čih pơtô yom biă mă tơdang ñu pơruai tui anai, “Yua mơ̆ng Tơlơi Pơthâo Hiam anŭn yơh ƀing gih hơmâo tŭ pơklaih laih, tơdah ƀing gih djă̱ kơjăp tui hăng boh hiăp kâo pơtô pơblang laih kơ ƀing gih. Tơdah ƀu djơ̆ tui anŭn ôh, tơlơi ƀing gih đaŏ jing đôč đač yơh,” kiăng laĭ, Tơlơi Pơthâo Hiam jing tơlơi pơklaih kơ abih bang mơnuih mơnam mơ̆ng tơlơi soh hăng tơlơi djai yơh. Ding kơna pơjao Paul pơtô pơhrăm kơ ƀing đaŏ kiăng kơ thâo hluh hăng djă̱ pioh Tơlơi Pơthâo Hiam anŭn. Anŭn jing tơlơi Yang Krist tŭ djai ƀơi kơyâo bơrơkal yuakơ tơlơi soh sat mơnuih mơnam tui hăng tơlơi Ơi Adai kiăng laih anŭn ƀơi hrơi tal klâo Ñu tŭ hơdip glaĭ dơ̆ng kiăng pơrơđah kơ tơlơi Ơi Adai hơmâo tŭ ư laih kơ tơlơi pơsăn drơi Yang Krist tŭ anŭn jing hiam klă biă mă yơh.
(2) Ding kơna pơjao Paul čih pơtô tui anŭn yuakơ kiăng kơ ƀing đaŏ thâo hluh sĭt kơ Tơlơi Pơthâo Hiam jing tơlơi tŭ yua prŏng biă mă kơ ƀing gơñu tơdang tŭ đaŏ kơ Yang Yêsu jing Khua Yang hăng Pô Pơklaih kơ pô. Tơdang tŭ daŏ laih, ƀing đaŏ či tŭ yap tơpă hơnơ̆ng ƀơi anăp Ơi Adai laih anŭn či tŭ tơlơi dưi gah yŭ tơlơi Ơi Adai git gai wai lăng yơh, kiăng kơ dưi hĭ hăng tơlơi dưi tơlơi soh hăng tơlơi dưi tơlơi djai brŭ. Sĭt yơh, ƀing đaŏ hơmâo găn laih mơ̆ng dêh čar kơnăm mơmŏt hăng nao pơ dêh čar tơlơi bơngač laih yơh tơdang tŭ ju̱m Yang Krist mŭt amăng tơlơi hơdip pô. Anŭn yơh jing tơlơi đaŏ năng lăp kơ abih bang mơnuih mơnam khŏm kiăng kơ hơmâo.
(3) Jing ƀing ană bă Ơi Adai, ƀing ta hơmâo dŏ laih amăng gah yŭ tơlơi dưi Khua Yang laih anŭn tơlơi dưi tơlơi soh hăng tơlơi djai ƀu dưi git gai ƀing ta dơ̆ng tah. Brơi kơ ƀing ta thâo hluh hăng ̱djă̱ kơjăp bĕ Tơlơi Pơthâo Hiam ƀing ta hơmâo tŭ mă laih. Tui anŭn, Ơ ƀing met anŏng ayŏng adơi ơi yă ană amôn khăp hơeng amăng Yang Krist hơi, brơi kơ ƀing ta thâo tŭ mă bĕ hăng gưt tui bĕ hơdôm tơlơi pơtô pơblang ƀing ding kơna pơjao đưm hlâo adih hơmâo pơtô laih amăng Khua Yang Yêsu Krist. Hơnŭn yơh, brơi kơ ƀing ta thâo đaŏ kơnang kơjăp nanao bĕ kơ Tơlơi Pơthâo Hiam Yang Krist hơmâo pha brơi laih tơdang Ñu pơsăn drơi Ñu ƀơi kơyâo bơrơkal yuakơ tơlơi soh sat ta. Bơni hiam.